Jump to Content

Jump to Content

ຂໍ້ກຳນົດການບໍລິການຂອງ Google Play

4 ສິງຫາ 2020

1. ການແນະນຳ

ຂໍ້ກຳນົດທີ່ນຳໃຊ້. ຂໍຂອບໃຈທີ່ໃຊ້ Google Play. Google Play ແມ່ນການບໍລິການທີ່ສະໜອງໃຫ້ໂດຍ Google LLC ("Google", "ພວກເຮົາ" ຫຼື "ເຮົາ"), ເຊິ່ງມີສຳນັກງານຕັ້ງຢູ່ 1600 Amphitheatre Parkway, Mountain View California 94043, USA. ການໃຊ້ Google Play ແລະ ແອັບຂອງທ່ານ (ລວມທັງແອັບພ້ອມໃຊ້ຂອງ Android), ເກມ, ເພງ, ຮູບເງົາ, ປຶ້ມ, ວາລະສານ ຫຼື ເນື້ອຫາດິຈິຕອນ ຫຼື ການບໍລິການອື່ນໆ (ຕໍ່ໄປເອີ້ນວ່າ "ເນື້ອຫາ") ທີ່ມີໃຫ້ຜ່ານການບໍລິການນີ້ແມ່ນຂຶ້ນກັບຂໍ້ກຳນົດການບໍລິການເຫຼົ່ານີ້ຂອງ Google Play ແລະ ຂໍ້ກຳນົດການບໍລິການຂອງ Google ("ຂໍ້ກຳນົດການບໍລິການຂອງ Google") (ທັງໝົດລວມກັນເອີ້ນວ່າ "ຂໍ້ກຳນົດ"). Google Play ແມ່ນ "ການບໍລິການ" ຕາມທີ່ອະທິບາຍໄວ້ໃນຂໍ້ກຳນົດການບໍລິການຂອງ Google. ຖ້າມີການຂັດກັນລະຫວ່າງຂໍ້ກຳນົດການບໍລິການຂອງ Google Play ແລະ ຂໍ້ກຳນົດການບໍລິການຂອງ Google, ແມ່ນໃຫ້ເອົາຕາມຂໍ້ກຳນົດການບໍລິການຂອງ Google Play.

2. ການໃຊ້ Google Play ຂອງທ່ານ

ການເຂົ້າເຖິງ ແລະ ການໃຊ້ເນື້ອຫາ. ທ່ານສາມາດໃຊ້ Google Play ເພື່ອເປີດເບິ່ງ, ຊອກຫາ, ຮັບຊົມ, ຖ່າຍທອດ ຫຼື ດາວໂຫຼດເນື້ອຫາສຳລັບມືຖື, ຄອມພິວເຕີ, ໂທລະພາບ, ໂມງ ຫຼື ອຸປະກອນອື່ນໆທີ່ຮອງຮັບ ("ອຸປະກອນ"). ເພື່ອໃຊ້ Google Play, ທ່ານຈະຕ້ອງມີອຸປະກອນທີ່ຕອບສະໜອງໄດ້ຂໍ້ກຳນົດດ້ານລະບົບ ແລະ ຄວາມເຂົ້າກັນໄດ້ສຳລັບເນື້ອຫາທີ່ກ່ຽວຂ້ອງ, ການເຂົ້າເຖິງອິນເຕີເນັດທີ່ໃຊ້ໄດ້ ແລະ ຊອບແວທີ່ເຂົ້າກັນໄດ້. ການມີໃຫ້ນຳໃຊ້ຂອງເນື້ອຫາ ແລະ ຄຸນສົມບັດຕ່າງໆຈະແຕກຕ່າງກັນໃນແຕ່ລະປະເທດ ແລະ ບໍ່ແມ່ນວ່າທຸກເນື້ອຫາ ຫຼື ຄຸນສົມບັດຈະສາມາດໃຊ້ໄດ້ໃນປະເທດຂອງທ່ານ. ບາງເນື້ອຫາອາດຈະສາມາດແບ່ງປັນກັບສະມາຊິກຄອບຄົວໄດ້. ເນື້ອຫາອາດຈະສະໜອງໃຫ້ໂດຍ Google ຫຼື ເຮັດໃຫ້ສາມາດໃຊ້ໄດ້ໂດຍພາກສ່ວນທີສາມທີ່ບໍ່ໄດ້ເປັນສາຂາຂອງ Google. Google ບໍ່ຮັບຜິດຊອບ ແລະ ບໍ່ອະນຸມັດເນື້ອຫາຕ່າງໆທີ່ມີໃຫ້ນຳໃຊ້ຜ່ານ Google Play ທີ່ມາຈາກແຫຼ່ງອື່ນໆທີ່ບໍ່ແມ່ນ Google.

ຂໍ້ຈຳກັດດ້ານອາຍຸ. ເພື່ອໃຊ້ Google Play, ທ່ານຕ້ອງມີບັນຊີ Google ທີ່ໃຊ້ໄດ້ ("ບັນຊີ Google"), ເຊິ່ງຂຶ້ນກັບ ຂໍ້ຈຳກັດດ້ານອາຍຸ ຕໍ່ໄປນີ້. ຖ້າທ່ານແມ່ນຜູ້ເຍົາໃນປະເທດຂອງທ່ານ, ທ່ານຕ້ອງມີການອະນຸຍາດຈາກພໍ່ແມ່ ຫຼື ຜູ້ປົກຄອງຕາມກົດໝາຍຂອງທ່ານເພື່ອໃຊ້ Google Play ແລະ ຍອມຮັບຂໍ້ກຳນົດ. ທ່ານຕ້ອງປະຕິບັດຕາມຂໍ້ຈຳກັດດ້ານອາຍຸເພີ່ມເຕີມທີ່ອາດຈະນຳໃຊ້ກັບການໃຊ້ເນື້ອຫາ ຫຼື ຄຸນສົມບັດສະເພາະໃນ Google Play. ຜູ້ຈັດການຄອບຄົວ ແລະ ສະມາຊິກຄອບຄົວຕ້ອງຕອບສະໜອງໄດ້ ຂໍ້ກຳນົດເພີ່ມເຕີມ ເຫຼົ່ານີ້ເຊັ່ນກັນ.

ຄ່າທຳນຽມຂອງພາກສ່ວນທີສາມ. ທ່ານຮັບຜິດຊອບຄ່າທຳນຽມການເຂົ້າເຖິງ ຫຼື ຄ່າຂໍ້ມູນທີ່ເກີດຈາກພາກສ່ວນທີສາມ (ເຊັ່ນວ່າ ຜູ້ໃຫ້ບໍລິການອິນເຕີເນັດ ຫຼື ຜູ້ໃຫ້ບໍລິການມືຖືຂອງທ່ານ) ທີ່ກ່ຽວຂ້ອງກັບການໃຊ້ ແລະ ການເບິ່ງເນື້ອຫາ ແລະ Google Play ຂອງທ່ານ.

ການອັບເດດ. Google Play, ຫ້ອງສະໝຸດການຊ່ວຍເຫຼືອທີ່ກ່ຽວຂ້ອງ ຫຼື ເນື້ອຫາ ອາດຈະຈຳເປັນຕ້ອງໄດ້ອັບເດດ, ຕົວຢຢ່າງ: ເພື່ອແກ້ໄຂຈຸດບົກຜ່ອງ, ປັບປຸງຟັງຊັນຕ່າງໆ, ປລັກອິນທີ່ບໍ່ເຫັນ ແລະ ເວີຊັນໃໝ່ (ລວມກັນເອີ້ນວ່າ "ການອັບເດດ"). ການອັບເດດດັ່ງກ່າວອາດຈະຈຳເປັນເພື່ອໃຫ້ທ່ານໃຊ້ Google Play ຫຼື ເຂົ້າເຖິງ, ດາວໂຫຼດ ຫຼື ໃຊ້ເນື້ອຫາໄດ້. ໂດຍການເຫັນດີນຳຂໍ້ກຳນົດເຫຼົ່ານີ້ ແລະ ການໃຊ້ Google Play, ທ່ານເຫັນດີຮັບເອົາການອັບເດດດັ່ງກ່າວໂດຍອັດຕະໂນມັດ. ທ່ານອາດຈະສາມາດຈັດການການອັບເດດຕໍ່ກັບບາງເນື້ອຫາສະເພາະຜ່ານການຕັ້ງຄ່າໃນ Google Play ໄດ້. ແນວໃດກໍຕາມ, ຖ້າມີການກຳນົດວ່າການອັບເດດຈະແກ້ໄຂຄວາມສ່ຽງດ້ານຄວາມປອດໄພທີ່ສຳຄັນທີ່ກ່ຽວຂ້ອງກັບເນື້ອຫາ, ການອັບເດດຈະຖືກເຮັດສຳເລັດໂດຍບໍ່ສົນການຕັ້ງຄ່າການອັບເດດຂອງທ່ານໃນ Google Play ຫຼື ອຸປະກອນຂອງທ່ານ. ຖ້າຮ້ານຄ້າແອັບອື່ນໃດໜຶ່ງພະຍາຍາມອັບເດດເນື້ອຫາທີ່ໃນເບື້ອງຕົ້ນດາວໂຫຼດຈາກ Google Play, ທ່ານອາດຈະໄດ້ຮັບຄຳເຕືອນ ຫຼື ອາດຈະມີການຂັດຂວາງການອັບເດດດັ່ງກ່າວໄວ້ທັງໝົດ.

ຂໍ້ມູນກ່ຽວກັບທ່ານ. ນະໂຍບາຍຄວາມເປັນສ່ວນຕົວ ຂອງ Google ອະທິບາຍວ່າພວກເຮົາປະຕິບັດຕໍ່ຂໍ້ມູນສ່ວນຕົວຂອງທ່ານ ແລະ ປົກປ້ອງຄວາມເປັນສ່ວນຕົວຂອງທ່ານແນວໃດໃນເວລານຳໃຊ້ Google Play. Google ອາດຈະຈຳເປັນຕ້ອງໃຫ້ຂໍ້ມູນສ່ວນຕົວຂອງທ່ານ ເຊັ່ນວ່າ ຊື່ ແລະ ທີ່ຢູ່ອີເມວ ແກ່ຜູ້ໃຫ້ບໍລິການຕ່າງໆເພື່ອຈຸດປະສົງຂອງການປະມວນຜົນທຸລະກຳຂອງທ່ານ ຫຼື ສະໜອງເນື້ອຫາໃຫ້ແກ່ທ່ານ. ຜູ້ໃຫ້ບໍລິການເຫັນດີໃຊ້ຂໍ້ມູນນີ້ໂດຍປະຕິບັດຕາມນະໂຍບາຍຄວາມເປັນສ່ວນຕົວຂອງເຂົາເຈົ້າ.

ຖ້າທ່ານແມ່ນສ່ວນໜຶ່ງຂອງກຸ່ມຄອບຄົວໃນ Google Play, ສະມາຊິກຄອບຄົວຂອງທ່ານໃນກຸ່ມຄອບຄົວນັ້ນຈະສາມາດເຫັນບາງຂໍ້ມູນສະເພາະກ່ຽວກັບທ່ານ. ຖ້າທ່ານແມ່ນຜູ້ຈັດການຄອບຄົວຂອງກຸ່ມຄອບຄົວໃນ Google Play, ສະມາຊິກຄອບຄົວທີ່ທ່ານເຊີນເຂົ້າຮ່ວມຄອບຄົວນັ້ນຈະເຫັນຊື່, ຮູບ ແລະ ທີ່ຢູ່ອີເມວຂອງທ່ານ. ຖ້າທ່ານເຂົ້າຮ່ວມກຸ່ມຄອບຄົວເປັນສະມາຊິກຄອບຄົວ, ສະມາຊິກອື່ນໃນຄອບຄົວຈະສາມາດເຫັນຊື່, ຮູບ ແລະ ທີ່ຢູ່ອີເມວຂອງທ່ານ. ຜູ້ຈັດການຄອບຄົວຂອງທ່ານອາດຈະເຫັນອາຍຸຂອງທ່ານນຳອີກ ແລະ ຈະເຫັນບັນທຶກການຊື້ທັງໝົດທີ່ທ່ານເຮັດໂດຍໃຊ້ວິທີການຈ່າຍເງິນຂອງຄອບຄົວທີ່ກຳນົດໄວ້ ລວມທັງລາຍລະອຽດຂອງເນື້ອຫາທີ່ຊື້. ຖ້າເນື້ອຫາມີໃຫ້ແບ່ງປັນໃນຄອບຄົວ ແລະ ທ່ານແບ່ງປັນເນື້ອຫານັ້ນກັບກຸ່ມຄອບຄົວຂອງທ່ານ, ສະມາຊິກຄອບຄົວທຸກຄົນຈະສາມາດເຂົ້າເຖິງເນື້ອຫານັ້ນໄດ້ ແລະ ເຫັນວ່າທ່ານເປັນຄົນຊື້ມັນ.

ການເຂົ້າເຖິງບັນຊີທີ່ບໍ່ໄດ້ຮັບອະນຸຍາດ. ທ່ານຕ້ອງຮັກສາລາຍລະອຽດບັນຊີຂອງທ່ານໃຫ້ປອດໄພ ແລະ ຕ້ອງບໍ່ເປີດເຜີຍພວກມັນກັບຄົນອື່ນ. ທ່ານຕ້ອງບໍ່ເກັບເອົາ ຫຼື ເກັບໂຮມຂໍ້ມູນສ່ວນຕົວຂອງຜູ້ໃຊ້ Google Play ຫຼື ຜູ້ໃຊ້ການບໍລິການອື່ນໆຂອງ Google ໃດໆກໍຕາມຜ່ານ Google Play ລວມທັງຊື່ບັນຊີ.

ບັນຊີທີ່ຖືກປິດນຳໃຊ້. ຖ້າ Google ປິດການເຂົ້າເຖິງບັນຊີຂອງທ່ານໂດຍປະຕິບັດຕາມຂໍ້ກຳນົດ (ຕົວຢ່າງ: ຖ້າທ່ານລະເມີດຂໍ້ກຳນົດ), ທ່ານອາດຈະຖືກຂັດຂວາງບໍ່ໃຫ້ເຂົ້າເຖິງ Google Play, ລາຍລະອຽດບັນຊີຂອງທ່ານ ຫຼື ໄຟລ໌ຕ່າງໆ ຫຼື ເນື້ອຫາອື່ນໆທີ່ເກັບໄວ້ໃນບັນຊີຂອງທ່ານ. ເບິ່ງ ສູນຊ່ວຍເຫຼືອ ສຳລັບຂໍ້ມູນເພີ່ມເຕີມ. ຖ້າທ່ານແມ່ນຜູ້ຈັດການຄອບຄົວຂອງຄອບຄົວໃນ Google Play ແລະ Google ປິດການເຂົ້າເຖິງບັນຊີຂອງທ່ານ, ສະມາຊິກຄອບຄົວຂອງທ່ານອາດຈະສູນເສຍການເຂົ້າເຖິງຄຸນສົມບັດສຳລັບຄອບຄົວທີ່ຈຳເປັນຕ້ອງມີກຸ່ມຄອບຄົວ ເຊັ່ນວ່າ ວິທີການຈ່າຍເງິນຂອງຄອບຄົວ, ການສະໝັກໃຊ້ຂອງຄອບຄົວ ຫຼື ເນື້ອຫາທີ່ແບ່ງປັນໂດຍສະມາຊິກຄອບຄົວ. ຖ້າທ່ານແມ່ນສະມາຊິກຂອງຄອບຄົວໃນ Google Play ແລະ Google ປິດນຳໃຊ້ບັນຊີຂອງທ່ານ, ສະມາຊິກຄອບຄົວຂອງທ່ານຈະສູນເສຍການເຂົ້າເຖິງເນື້ອຫາທີ່ທ່ານແບ່ງປັນກັບເຂົາເຈົ້າ.

ການປ້ອງກັນມາລແວ. ເພື່ອປົກປ້ອງທ່ານຈາກຊອບແວພາກສ່ວນທີສາມທີ່ອັນຕະລາຍ, URL ແລະ ບັນຫາດ້ານຄວາມປອດໄພອື່ນໆ, Google ອາດຈະຮັບເອົາຂໍ້ມູນກ່ຽວກັບການເຊື່ອມຕໍ່ເຄືອຂ່າຍຂອງ Device ຂອງທ່ານ, URL ທີ່ອາດຈະອັນຕະລາຍ, ລະບົບປະຕິບັດການ ແລະ ແອັບຕ່າງໆທີ່ຕິດຕັ້ງຢູ່ໃນອຸປະກອນຂອງທ່ານຜ່ານ Google Play ຫຼື ຈາແຫຼ່ງອື່ນໆ. Google ອາດຈະເຕືອນທ່ານຖ້າມັນເຫັນວ່າແອັບ ຫຼື URL ໃດໜຶ່ງບໍ່ປອດໄພ ຫຼື Google ອາດຈະລຶບອອກ ຫຼື ບລັອກການຕິດຕັ້ງຂອງມັນໃນອຸປະກອນຂອງທ່ານ ຖ້າມັນຮູ້ວ່າມັນເປັນອັນຕະລາຍຕໍ່ກັບອຸປະກອນ, ຂໍ້ມູນ ຫຼື ຜູ້ໃຊ້. ທ່ານສາມາດເລືອກປິດນຳໃຊ້ບາງການປົກປ້ອງເຫຼົ່ານີ້ໄດ້ໃນການຕັ້ງຄ່າໃນອຸປະກອນຂອງທ່ານ, ແນວໃດກໍຕາມ, Google ອາດຈະສືບຕໍ່ຮັບເອົາຂໍ້ມູນກ່ຽວກັບແອັບທີ່ຕິດຕັ້ງຜ່ານ Google Play ແລະ ອາດຈະມີການສືບຕໍ່ວິເຄາະແອັບທີ່ຕິດຕັ້ງໃນອຸປະກອນຂອງທ່ານຈາກແຫຼ່ງອື່ນໆເພື່ອເບິ່ງບັນຫາຄວາມປອດໄພ ໂດຍບໍ່ສົ່ງຂໍ້ມູນໃຫ້ Google.

ແອັບພ້ອມໃຊ້ຂອງ Android. ໃນເວລາຄລິກໃສ່ລິ້ງໃນອຸປະກອນຂອງທ່ານ, Google Play ອາດຈະກວດເບິ່ງວ່າມີແອັບພ້ອມໃຊ້ຫຼືບໍ່ ແລະ ຖ້າມີ, ເປີດລິ້ງນັ້ນຢູ່ພາຍໃນແອັບພ້ອມໃຊ້ນັ້ນ. ລະຫັດທີ່ຈຳເປັນເພື່ອເປີດສ່ວນຕ່າງໆຂອງແອັບພ້ອມໃຊ້ທີ່ທ່ານເຂົ້າເຖິງຈະຖືກດາວໂຫຼດໃສ່ອຸປະກອນຂອງທ່ານ ແລະ ຮັກສາໄວ້ແບບຊົ່ວຄາວ. ສາມາດເບິ່ງລາຍລະອຽດແອັບສຳລັບແອັບພ້ອມໃຊ້ໄດ້ໃນຮ້ານຄ້າ Google Play. ຂໍ້ມູນ ແລະ ການຕັ້ງຄ່າແອັບພ້ອມໃຊ້ຂອງ Android ຖືກຊິ້ງກັບອຸປະກອນທີ່ເຂົ້າສູ່ລະບົບດ້ວຍບັນຊີ Google ຂອງທ່ານ. ທ່ານສາມາດເລືອກປິດນຳໃຊ້ແອັບພ້ອມໃຊ້ຂອງ Android ໃນການຕັ້ງຄ່າຢຸ່ໃນອຸປະກອນຂອງທ່ານ.

ການປ່ຽນແປງຕໍ່ກັບຂໍ້ກຳນົດເຫຼົ່ານີ້. ຖ້າຂໍ້ກຳນົດປ່ຽນແປງ, ທ່ານຈະໄດ້ຮັບການແຈ້ງບອກຢ່າງໜ້ອຍ 30 ມື້ ແລະ ຂໍ້ກຳນົດໃໝ່ຈະມີຜົນນຳໃຊ້ຫຼັງຈາກໄລຍະເວລາແຈ້ງບອກດັ່ງກ່າວ. ການສືບຕໍ່ໃຊ້ Google Play ຂອງທ່ານຫຼັງຈາກໄລຍະການແຈ້ງບອກດັ່ງກ່າວຈະຊີ້ບອກວ່າທ່ານຍອມຮັບຂໍ້ກຳນົດໃໝ່. ຂໍ້ກຳນົດໃໝ່ຈະນຳໃຊ້ກັບການໃຊ້ທຸກເນື້ອຫາຂອງທ່ານ (ລວມທັງເນື້ອຫາທີ່ທ່ານໄດ້ຕິດຕັ້ງ ຫຼື ຊື້ໃນເມື່ອກ່ອນ) ແລະ ທັງໝົດທີ່ຕິດຕັ້ງ ຫຼື ຊື້ໃນເວລາຕໍ່ມາ. ຖ້າທ່ານບໍ່ເຫັນດີນຳການປ່ຽນແປງດັ່ງກ່າວ, ທ່ານຈະມີໂອກາດດາວໂຫຼດເນື້ອຫາທີ່ທ່ານຊື້ ຫຼື ຕິດຕັ້ງໃນເມື່ອກ່ອນ ແລະ ຢຸດເຊົາການໃຊ້ Google Play ຂອງທ່ານ. ທ່ານອາດຈະສືບຕໍ່ເບິ່ງສຳເນົາຂອງເນື້ອຫານັ້ນໃນອຸປະກອນຂອງທ່ານໂດຍປະຕິບັດຕາມຂໍ້ກຳນົດສະບັບສຸດທ້າຍທີ່ທ່ານຍອມຮັບໄດ້.

3. ການຊື້ ແລະ ການຈ່າຍເງິນ

ເນື້ອຫາຟຣີ. Google ອາດຈະອະນຸຍາດໃຫ້ທ່ານດາວໂຫຼດ, ເບິ່ງ ຫຼື ໃຊ້ເນື້ອຫາໂດຍບໍ່ເສຍຄ່າໃນ Google Play. ອາດຈະນຳໃຊ້ຂໍ້ຈຳກັດເພີ່ມເຕີມຕໍ່ກັບການເຂົ້າເຖິງ ແລະ ການໃຊ້ບາງເນື້ອຫາຟຣີສະເພາະ.

ການຊື້ເນື້ອຫາ. ໃນເວລາທີ່ທ່ານຊື້ເນື້ອຫາໃນ ຫຼື ໂດຍໃຊ້ Google Play ທ່ານຈະລົງນາມໃນສັນຍາຊື້ຂາຍແຍກຕ່າງຫາກອີງຕາມຂໍ້ກຳນົດເຫຼົ່ານີ້ (ຕາມທີ່ກ່ຽວຂ້ອງ) ກັບຜູ້ຂາຍທີ່ຈະແມ່ນ:

(a) Google Ireland Limited; ຫຼື

(b) ຜູ້ໃຫ້ບໍລິການເນື້ອຫາ (ເອີ້ນວ່າ "ຜູ້ໃຫ້ບໍລິການ"), (ລວມທັງບ່ອນທີ່ Google Ireland Limited ເຮັດໜ້າທີ່ເປັນຕົວແທນໃຫ້ແກ່ຜູ້ໃຫ້ບໍລິການ.

ສັນຍາຊື້ຂາຍແຍກຕ່າງຫາກແມ່ນສ່ວນເພີ່ມຂອງຂໍ້ກຳນົດເຫຼົ່ານີ້.

ສຳລັບການຂາຍທີ່ Google ເຮັດໜ້າທີ່ເປັນຕົວແທນໃຫ້ແກ່ຜູ້ໃຫ້ບໍລິການ, ຖ້ອຍຄຳໃນຂໍ້ກຳນົດການບໍລິການຂອງ Google ທີ່ບອກວ່າຂໍ້ກຳນົດການບໍລິການຂອງ Google "ບໍ່ສ້າງສິດທິຜູ້ໄດ້ຮັບຜົນປະໂຫຍດພາກສ່ວນທີສາມໃດໆ", ບໍ່ນຳໃຊ້ກັບການໃຊ້ Google Play ຂອງທ່ານ.

ສັນຍາສຳລັບການຊື້ ແລະ ການໃຊ້ເນື້ອຫາຖືວ່າສຳເລັດເມື່ອທ່ານໄດ້ຮັບອີເມວຈາກ Google ທີ່ຢືນຢັນການຊື້ເນື້ອຫານັ້ນຂອງທ່ານ ແລະ ການປະຕິບັດສັນຍານີ້ເລີ່ມໃນທັນທີທີ່ການຊື້ສຳເລັດ.

:ຄຳສັ່ງຊື້ລ່ວງໜ້າ. ເມື່ອທ່ານສັ່ງຊື້ເນື້ອຫາລ່ວງໜ້າ, ສັນຍາຂອງທ່ານສຳລັບການຊື້ ແລະ ການໃຊ້ລາຍການນັ້ນຖືວ່າສຳເລັດເມື່ອມີການເຮັດໃຫ້ເນື້ອຫານັ້ນມີໃຫ້ແກ່ທ່ານ ແລະ ທ່ານຈະຖືກຮຽກເກັບເງິນສຳລັບການຊື້ໃນເວລານັ້ນ. ທ່ານສາມາດຍົກເລີກຄຳສັ່ງຊື້ລ່ວງໜ້າຂອງທ່ານໄດ້ທຸກເມື່ອຈຸດຮອດເວລາທີ່ເນື້ອຫາມີໃຫ້ແກ່ທ່ານ. ພວກເຮົາຈຳເປັນຕ້ອງຍົກເລີກຄຳສັ່ງຊື້ຂອງທ່ານຖ້າເນື້ອຫາຖືກຖອນອອກຈາກການຂາຍຜ່ານ Google Play ກ່ອນທີ່ຈະມີໃຫ້ແກ່ທ່ານ ແລະ ພວກເຮົາມີສິດຍົກເລີກຄຳສັ່ງຊື້ຂອງທ່ານໃນກໍລະນີທີ່ລາຄາປ່ຽນແປງກ່ອນຄຳສັ່ງຊື້ຂອງທ່ານຖືກປະຕິບັດ.

ວິທີການຈ່າຍເງິນຂອງຄອບຄົວ. ຖ້າທ່ານແມ່ນຜູ້ຈັດການຄອບຄົວຂອງກຸ່ມຄອບຄົວໃດໜຶ່ງໃນ Google Play, ທ່ານຈະຈຳເປັນຕ້ອງຕັ້ງວິທີການຈ່າຍເງິນຂອງຄອບຄົວທີ່ໃຊ້ໄດ້ເພື່ອໃຫ້ສະມາຊິກຄອບຄົວຂອງທ່ານໃຊ້ຊື້ເນື້ອຫາຕ່າງໆໃນ Google Play ແລະ ພາຍໃນແອັບ. ທ່ານຈະຮັບຜິດຊອບການຊື້ເນື້ອຫາຂອງສະມາຊິກຄອບຄົວຂອງທ່ານທຸກຄົນທີ່ໃຊ້ວິທີການຈ່າຍເງິນຂອງຄອບຄົວ. ຖ້າກຸ່ມຄອບຄົວຖືກລຶບ ຫຼື ສະມາຊິກຄອບຄົວອອກຈາກກຸ່ມຄອບຄົວ, ທ່ານອາດຈະຖືກຮຽກເກັບເງິນສຳລັບການຊື້ທີ່ຄ້າງຊຳລະທີ່ເຮັດໂດຍສະມາຊິກຄອບຄົວໂດຍໃຊ້ວິທີການຈ່າຍເງິນຂອງຄອບຄົວ.

Google Payments. ເພື່ອຊື້ເນື້ອຫາຜ່ານ Google Play, ທ່ານຕ້ອງມີບັນຊີ Google Payments ແລະ ເຫັນດີນຳ ຂໍ້ກຳນົດການບໍລິການ ຂອງ Google Payments. ແຈ້ງການຄວາມເປັນສ່ວນຕົວຂອງ Google Payments ນຳໃຊ້ໃນທຸກຄັ້ງທີ່ທ່ານຊື້ເນື້ອຫາໂດຍໃຊ້ບັນຊີ Google Payments. ທ່ານຮັບຜິດຊອບຈ່າຍຈຳນວນທັງໝົດທີ່ຕ້ອງຈ່າຍທີ່ກ່ຽວຂ້ອງກັບການຊື້ທີ່ເຮັດຜ່ານ Google Play ໃນບັນຊີ Google Payments ຂອງທ່ານ.

ວິທີການດຳເນີນການຈ່າຍເງິນອື່ນ. Google ອາດຈະໃຫ້ວິທີການດຳເນີນການຈ່າຍເງິນຕ່າງໆແກ່ທ່ານ ນອກຈາກ Google Payments ເພື່ອອຳນວຍຄວາມສະດວກໃຫ້ແກ່ການຊື້ເນື້ອຫາຜ່ານ Google Play. ທ່ານຕ້ອງປະຕິບັດຕາມຂໍ້ກຳນົດ ແລະ ເງື່ອນໄຂທີ່ກ່ຽວຂ້ອງ ຫຼື ສັນຍາທາງກົດໝາຍອື່ນໆ ບໍ່ວ່າຈະກັບ Google ຫຼື ພາກສ່ວນທີສາມ ທີ່ຄວບຄຸມການໃຊ້ວິທີດຳເນີນການຈ່າຍເງິນທີ່ໃຫ້ໄວ້. Google ອາດຈະເພີ່ມ ຫຼື ລຶບວິທີດຳເນີນການຈ່າຍເງິນອອກຕາມການຕັດສິນໃຈຂອງຕົນ. ທ່ານຮັບຜິດຊອບພຽງຝ່າຍດຽວສຳລັບຈຳນວນທັງໝົດທີ່ຕ້ອງຈ່າຍທີ່ກ່ຽວຂ້ອງກັບການຊື້ຕ່າງໆທີ່ທ່ານເຮັດໃນ Google Play.

ການມີສິດສຳລັບການຮຽກເກັບເງິນນຳຜູ້ໃຫ້ບໍລິການ. ເພື່ອຕັດສິນກຳນົດການມີສິດຂອງທ່ານໃນການໃຫ້ຮຽກເກັບເງິນຄ່າການຊື້ເນື້ອຫາທີ່ທ່ານເຮັດຜ່ານອຸປະກອນຂອງທ່ານນຳບັນຊີຂອງຜູ້ໃຫ້ບໍລິການເຄືອຂ່າຍຂອງທ່ານ, ໃນເວລາທີ່ທ່ານສ້າງບັນຊີ Google Play ໃນອຸປະກອນ, ພວກເຮົາຈະສົ່ງຕົວລະບຸອຸປະກອນຂອງທ່ານ ເຊັ່ນວ່າ: ID ຜູ້ສະໝັກໃຊ້ ແລະ ໝາຍເລກລຳດັບແຜ່ນ SIM ຫາຜູ້ໃຫ້ບໍລິການເຄືອຂ່າຍຂອງທ່ານ. ເພື່ອອະນຸຍາດສິ່ງນີ້ ທ່ານຈະຈຳເປັນຕ້ອງຍອມຮັບຂໍ້ກຳນົດການບໍລິການຂອງຜູ້ໃຫ້ບໍລິການເຄືອຂ່າຍ. ຜູ້ໃຫ້ບໍລິການເຄືອຂ່າຍອາດຈະສົ່ງຂໍ້ມູນທີ່ຢູ່ສຳລັບຮຽກເກັບເງິນຂອງທ່ານໃຫ້ພວກເຮົາ. ພວກເຮົາຈະຮັກສາໄວ້ ແລະ ໃຊ້ຂໍ້ມູນນີ້ອີງຕາມ ນະໂຍບາຍຄວາມເປັນສ່ວນຕົວ ຂອງ Google ແລະ ແຈ້ງການຄວາມເປັນສ່ວນຕົວ ຂອງ Google Payments.

ລາຄາ. ລາຄາ ແລະ ການມີຢູ່ຂອງເນື້ອຫາທັງໝົດທີ່ສະແດງຜ່ານ Google Play ອາດຈະປ່ຽນແປງໄດ້ທຸກເວລາກ່ອນການຊື້.

ອາກອນ. "ອາກອນ" ໝາຍເຖິງຄ່າພາສີ, ຄ່າທຳນຽມພາສີຜ່ານແດນ, ພາສີ ຫຼື ອາກອນຕ່າງໆ (ນອກຈາກອາກອນລາຍໄດ້) ທີ່ກ່ຽວພັນກັບການຂາຍເນື້ອຫາ ລວມທັງຄ່າປັບໃໝ ຫຼື ດອກເບ້ຍທີ່ກ່ຽວຂ້ອງຕ່າງໆ. ທ່ານຮັບຜິດຊອບຈ່າຍອາກອນ ແລະ ຕ້ອງຈ່າຍຄ່າເນື້ອຫາໂດຍບໍ່ມີການຫັກລົບຄ່າອາກອນໃດໆ. ຖ້າຜູ້ຂາຍເນື້ອຫາ ຫຼື Google ມີພັນທະເກັບເອົາ ຫຼື ຈ່າຍຄ່າອາກອນ, ອາກອນຈະຖືກຮຽກເກັບນຳທ່ານ. ທ່ານຕ້ອງປະຕິບັດຕາມທຸກກົດໝາຍທີ່ນຳໃຊ້ ລວມທັງການແຈ້ງ ແລະ ການຈ່າຍອາກອນທີ່ເກີດຂຶ້ນຈາກການໃຊ້ Google Play ຫຼື ການຊື້ເນື້ອຫາຢູ່ໃນ ຫຼື ຜ່ານ Google Play. ການແຈ້ງ ແລະ ການຈ່າຍອາກອນທີ່ກ່ຽວຂ້ອງດັ່ງກ່າວແມ່ນຄວາມຮັບຜິດຊອບຂອງທ່ານ.

ການຂາຍທັງໝົດແມ່ນສຸດທ້າຍ. ເບິ່ງ ນະໂຍບາຍການສົ່ງເງິນຄືນ ຂອງ Google Play ສຳລັບນະໂຍບາຍກ່ຽວກັບສິດທິຂອງທ່ານໃນການຖອນ, ຍົກເລີກ ຫຼື ສົ່ງຄືນສິ່ງທີ່ຊື້ເພື່ອຮັບເອົາການສົ່ງເງິນຄືນ. ຍົກເວັ້ນຕາມທີ່ກຳນົດໄວ້ຢ່າງຈະແຈ້ງໃນ ນະໂຍບາຍການສົ່ງເງິນຄືນ ຂອງ Google Play ຫຼື ນະໂຍບາຍການສົ່ງເງິນຄືນຂອງຜູ້ໃຫ້ບໍລິການ, ການຂາຍທັງໝົດແມ່ນສຸດທ້າຍ ແລະ ບໍ່ອະນຸຍາດໃຫ້ສົ່ງຄືນ, ປ່ຽນໃໝ່ ຫຼື ສົ່ງເງິນຄືນໄດ້. ຖ້າອະນຸຍາດໃຫ້ປ່ຽນໃໝ່, ສົ່ງຄືນ ຫຼື ສົ່ງເງິນຄືນສຳລັບທຸລະກຳຕ່າງໆ, ທຸລະກຳດັ່ງກ່າວອາດຈະຖືກປີ້ນຄືນ ແລະ ທ່ານອາດຈະບໍ່ສາມາດເຂົ້າເຖິງເນື້ອຫາທີ່ທ່ານເຄີຍໄດ້ມາຜ່ານທຸລະກຳນັ້ນໄດ້ອີກຕໍ່ໄປ.

ການສະໝັກໃຊ້. ມີການຮຽກເກັບຄ່າການສະໝັກໃຊ້ໂດຍອັດຕະໂນມັດໃນແຕ່ລະໄລຍະຮຽກເກັບເງິນ (ບໍ່ວ່າຈະເປັນແບບລາຍອາທິດ, ລາຍເດືອນ, ລາຍປີ ຫຼື ໄລຍະເວລາອື່ນ) ແລະ ທ່ານອາດຈະຖືກຮຽກເກັບເງິນບໍ່ເກີນ 24 ຊົ່ວໂມງກ່ອນເລີ່ມຕົ້ນແຕ່ລະໄລຍະຮຽກເກັບເງິນ.

(a) ໄລຍະທົດລອງໃຊ້. ໃນເວລາທີ່ທ່ານສະໝັກໃຊ້ເນື້ອຫາສຳລັບລາຄາໃດໜຶ່ງ, ທ່ານອາດຈະໄດ້ຮັບການເຂົ້າເຖິງຜົນປະໂຫຍດການສະໝັກໃຊ້ນັ້ນໂດຍບໍ່ເສຍຄ່າສຳລັບໄລຍະທົດລອງໃຊ້ທີ່ກຳນົດໄວ້ ຫຼັງຈາກນັ້ນທ່ານຖືກຮຽກເກັບເງິນຈົນກວ່າວ່າທ່ານຍົກເລີກການສະໝັກໃຊ້ຂອງທ່ານ. ເພື່ອຫຼີກເວັ້ນການຖືກຮຽກເກັບເງິນ, ທ່ານຕ້ອງຍົກເລີກກ່ອນສິ້ນສຸດໄລຍະທົດລອງໃຊ້. ເມື່ອທ່ານຍົກເລີກການທົດລອງໃຊ້ຂອງທ່ານແລ້ວ, ທ່ານຈະເສຍການເຂົ້າເຖິງແອັບທີ່ກ່ຽວຂ້ອງ ແລະ ສິດທິຕ່າງໆຂອງການສະໝັກໃຊ້ໃນທັນທີ ເວັ້ນເສຍແຕ່ວ່າມີການລະບຸໄວ້ເປັນຢ່າງອື່ນ. ການເຂົ້າເຖິງໄລຍະທົດລອງໃຊ້ດັ່ງກ່າວອາດຈະຈຳກັດສະເພາະໃຫ້ແຕ່ການທົດລອງໃຊ້ສະເພາະຈຳນວນໜຶ່ງສຳລັບຜູ້ໃຊ້ແຕ່ລະຄົນໃນລະຫວ່າງໄລຍະເວລາທີ່ກຳນົດໄວ້ ຫຼື ການຈຳກັດອື່ນ.

(b) ການຍົກເລີກ. ທ່ານສາມາດຍົກເລີກການສະໝັກໃຊ້ໄດ້ທຸກເວລາກ່ອນສິ້ນສຸດໄລຍະຮຽກເກັບເງິນທີ່ນຳໃຊ້ຕາມທີ່ອະທິບາຍໄວ້ໃນ ສູນຊ່ວຍເຫຼືອ ແລະ ການຍົກເລີກຈະນຳໃຊ້ກັບໄລຍະຕໍ່ໄປ. ຕົວຢ່າງ: ຖ້າທ່ານຊື້ການສະໝັກໃຊ້ລາຍເດືອນ, ທ່ານສາມາດຍົກເລີກການສະໝັກໃຊ້ນັ້ນໄດ້ທຸກເວລາໃນລະຫວ່າງເດືອນໃດໆກໍໄດ້ຂອງການສະໝັກໃຊ້ ແລະ ການສະໝັກໃຊ້ນັ້ນຈະຖືກຍົກເລີກໃນເດືອນຕໍ່ໄປ. ທ່ານຈະບໍ່ໄດ້ຮັບການສົ່ງເງິນຄືນສຳລັບໄລຍະຮຽກເກັບເງິນປັດຈຸບັນ, ຍົກເວັ້ນມີການກຳນົດໄວ້ເປັນຢ່າງອື່ນໃນ ນະໂຍບາຍການສົ່ງເງິນຄືນຂອງ Google Play (ຕົວຢ່າງ ເມື່ອເນື້ອຫາມີຈຸດບົກຜ່ອງເສຍຫາຍ). ການສະໝັກໃຊ້ Google Play Newsstand: ທ່ານຈະສືບຕໍ່ໄດ້ຮັບເນື້ອຫາ ແລະ ການອັບເດດ (ຖ້າກ່ຽວຂ້ອງ) ຈາກການສະໝັກໃຊ້ທີ່ກ່ຽວຂ້ອງໃນຊ່ວງທີ່ຍັງເຫຼືອຂອງໄລຍະຮຽກເກັບເງິນປັດຈຸບັນ. ຫຼັງຈາກໄລຍະຮຽກເກັບເງິນນັ້ນສິ້ນສຸດ, ທ່ານຈະສືບຕໍ່ເຂົ້າເຖິງສະບັບວາລະສານທີ່ສົ່ງໃຫ້ໃນເມື່ອກ່ອນຄືເກົ່າ ແຕ່ການເຂົ້າເຖິງເນື້ອຫາຂ່າວແບບເສຍເງິນຂອງທ່ານຈະຢຸດເຊົາໃນຕອນທ້າຍໄລຍະຮຽກເກັບເງິນທີ່ການສະໝັກໃຊ້ຂອງທ່ານຖືກຍົກເລີກ. ຖ້າທ່ານຍົກເລີກໃນຊ່ວງໄລຍະທົດລອງໃຊ້ຟຣີ, ທ່ານຈະຍັງມີການເຂົ້າເຖິງວາລະສານສະບັບຕ່າງໆທີ່ທ່ານເຂົ້າເຖິງໃນໄລຍະທົດລອງໃຊ້ຟຣີ, ແຕ່ທ່ານຈະບໍ່ສືບຕໍ່ມີການເຂົ້າເຖິງເນື້ອຫາຂ່າວ. ການສະໝັກໃຊ້ Google Play Music: ຖ້າທ່ານຍົກເລີກການສະໝັກໃຊ້ Google Play Music ຂອງທ່ານ, ທ່ານຈະສືບຕໍ່ມີການເຂົ້າເຖິງເນື້ອຫາການສະໝັກໃຊ້ Google Play Music ໃນຊ່ວງເວລາທີ່ເຫຼືອຂອງໄລຍະຮຽກເກັບເງິນປັດຈຸບັນ; ແນວໃດກໍຕາມ, ການເຂົ້າເຖິງຂອງທ່ານຈະສິ້ນສຸດໃນຕອນທ້າຍໄລຍະຮຽກເກັບເງິນທີ່ການສະໝັກໃຊ້ຂອງທ່ານຖືກຍົກເລີກ. ຖ້າທ່ານຍົກເລີກການສະໝັກໃຊ້ Google Play Music ໃນລະຫວ່າງໄລຍະທົດລອງໃຊ້ຟຣີ, ທ່ານຈະບໍ່ສືບຕໍ່ມີການເຂົ້າເຖິງເນື້ອຫາການສະໝັກໃຊ້ Google Play Music ທີ່ທ່ານເຄີຍເຂົ້າເຖິງໃນລະຫວ່າງໄລຍະທົດລອງໃຊ້ຟຣີ.

(c) ສ່ວນຫຼຸດສຳລັບຜູ້ສະໝັກໃຊ້ສະບັບພິມ. ບາງຜູ້ໃຫ້ບໍລິການວາລະສານອາດຈະອະນຸຍາດໃຫ້ທ່ານຊື້ການສະໝັກໃຊ້ເນື້ອຫາວາລະສານທີ່ອອກເປັນຊ່ວງໄລຍະໃນ Google Play ໃນລາຄາຜ່ອນ ຖ້າທ່ານແມ່ນຜູ້ສະໝັກໃຊ້ສະບັບພິມຢູ່ແລ້ວ. ຖ້າທ່ານຍົກເລີກການສະໝັກໃຊ້ສະບັບພິມຂອງວາລະສານທີ່ອອກເປັນຊ່ວງໄລຍະ ຫຼື ການສະໝັກໃຊ້ສະບັບພິມຂອງທ່ານໝົດອາຍຸ ແລະ ທ່ານບໍ່ໄດ້ຕໍ່ໃໝ່, ການສະໝັກໃຊ້ເນື້ອຫານັ້ນໃນລາຄາຜ່ອນຂອງທ່ານຢູ່ໃນ Google Play ຈະຖືກຍົກເລີກໂດຍອັດຕະໂນມັດ.

(d) ການປ່ຽນລາຄາ. ເມື່ອທ່ານຊື້ການສະໝັກໃຊ້ໃດໜຶ່ງ, ທ່ານຈະຖືກຮຽກເກັບເງິນໃນເບື້ອງຕົ້ນໃນລາຄາທີ່ນຳໃຊ້ໃນເວລາທີ່ທ່ານຕົກລົງສະໝັກໃຊ້. ຖ້າລາຄາການສະໝັກໃຊ້ເພີ່ມຂຶ້ນໃນພາຍຫຼັງ, Google ຈະແຈ້ງບອກທ່ານ. ການຂຶ້ນລາຄາຈະນຳໃຊ້ກັບການຈ່າຍເງິນຄັ້ງຕໍ່ໄປທີ່ຮອດກຳນົດຈ່າຍຈາກທ່ານຫຼັງຈາກການແຈ້ງບອກນີ້, ໂດຍມີເງື່ອນໄຂວ່າທ່ານໄດ້ຮັບການແຈ້ງບອກລ່ວງໜ້າຢ່າງໜ້ອຍ 10 ມື້ກ່ອນເຮັດການປ່ຽນແປງ. ຖ້າທ່ານໄດ້ຮັບການແຈ້ງບອກລ່ວງໜ້າໜ້ອຍກວ່າ 10 ມື້, ການຂຶ້ນລາຄາຈະບໍ່ນຳໃຊ້ຈົນກວ່າຮອດການຈ່າຍເງິນຫຼັງຈາກຮອດກຳນົດຈ່າຍຄັ້ງຕໍ່ໄປ. ຖ້າທ່ານບໍ່ຕ້ອງການຈ່າຍລາຄາທີ່ເພີ່ມຂຶ້ນສຳລັບການສະໝັກໃຊ້ໃດໜຶ່ງ, ທ່ານສາມາດຍົກເລີກການສະໝັກໃຊ້ນັ້ນໄດ້ ຕາມທີ່ອະທິບາຍໄວ້ໃນຫົວຂໍ້ການຍົກເລີກຂອງຂໍ້ກຳນົດເຫຼົ່ານີ້ ແລະ ທ່ານຈະບໍ່ຖືກຮຽກເກັບເງິນເພີ່ມອີກສຳລັບການສະໝັກໃຊ້ນັ້ນ, ໂດຍບໍ່ມີເງື່ອນໄຂວ່າທ່ານໄດ້ແຈ້ງບອກພວກເຮົາກ່ອນສິ້ນສຸດໄລຍະຮຽກເກັບເງິນປັດຈຸບັນ. ໃນບ່ອນທີ່ຜູ້ໃຫ້ບໍລິການຂຶ້ນລາຄາການສະໝັກໃຊ້ ແລະ ຈຳເປັນຕ້ອງມີການຍິນຍອມເຫັນດີ, Google ອາດຈະຍົກເລີກການສະໝັກໃຊ້ຂອງທ່ານ ເວັ້ນເສຍແຕ່ວ່າທ່ານເຫັນດີນຳລາຄາໃໝ່. ຖ້າການສະໝັກໃຊ້ຂອງທ່ານຖືກຍົກເລີກ ແລະ ໃນຕໍ່ມາທ່ານຕັດສິນໃຈສະໝັກໃຊ້ຄືນໃໝ່, ທ່ານຈະຖືກຮຽກເກັບເງິນຕາມອັດຕາລາຄາການສະໝັກໃຊ້ປັດຈຸບັນ.

4. ສິດທິ ແລະ ຂໍ້ຈຳກັດ

ໃບອະນຸຍາດນຳໃຊ້ເນື້ອຫາ. ຫຼັງຈາກເຮັດສຳເລັດທຸລະກຳ ຫຼື ຈ່າຍຄ່າທຳນຽມທີ່ກ່ຽວຂ້ອງສຳລັບເນື້ອຫາແລ້ວ, ທ່ານຈະມີສິດທິແບບບໍ່ຈຳກັດ, ພຽງຜູ້ດຽວຕາມທີ່ອະນຸຍາດໄວ້ຢ່າງຈະແຈ້ງໃນຂໍ້ກຳນົດເຫຼົ່ານີ້ ແລະ ນະໂຍບາຍທີ່ກ່ຽວຂ້ອງ ເພື່ອເກັບຮັກສາ, ເຂົ້າເຖິງ, ເບິ່ງ, ໃຊ້ ແລະ ສະແດງສຳເນົາຂອງເນື້ອຫາທີ່ກ່ຽວຂ້ອງໃນອຸປະກອນຂອງທ່ານ ຫຼື ຕາມການອະນຸຍາດເປັນຢ່າງອື່ນທີ່ເປັນສ່ວນໜຶ່ງຂອງການບໍລິການສຳລັບການໃຊ້ສ່ວນຕົວທີ່ບໍ່ແມ່ນທາງການຄ້າ. ພວກເຮົາສະຫງວນສິດທິ, ກຳມະສິດ ແລະ ສິດຜົນປະໂຫຍດທັງໝົດໃນ Google Play ແລະ ເນື້ອຫາທີ່ບໍ່ໄດ້ອະນຸຍາດໃຫ້ຢ່າງຈະແຈ້ງແກ່ທ່ານໄວ້. ການໃຊ້ແອັບ ແລະ ເກມຂອງທ່ານອາດຈະຖືກຄວບຄຸມໂດຍຂໍ້ກຳນົດ ແລະ ເງື່ອນໄຂເພີ່ມເຕີມຂອງຂໍ້ຕົກລົງໃບອະນຸຍາດຜູ້ໃຊ້ສຸດທ້າຍລະຫວ່າງທ່ານ ແລະ ຜູ້ໃຫ້ບໍລິການນັ້ນ.

ການລະເມີດຂໍ້ກຳນົດຂອງໃບອະນຸຍາດ. ຖ້າທ່ານລະເມີດຂໍ້ກຳນົດໃດໆກໍຕາມ, ສິດທິຂອງທ່ານພາຍໃຕ້ໃບອະນຸຍາດນີ້ຈະຢຸດເຊົາໃນທັນທີ ແລະ Google ອາດຈະຢຸດເຊົາການເຂົ້າເຖິງ Google Play, ເນື້ອຫາ ຫຼື ບັນຊີ Google ຂອງທ່ານໂດຍບໍ່ມີການສົ່ງເງິນຄືນໃຫ້ແກ່ທ່ານ.

ຂໍ້ຈຳກັດ: ທ່ານບໍ່ສາມາດ:

ຂໍ້ບັນຍັດພາກສ່ວນທີສາມ. ເຖິງແມ່ນຈະມີອັນໃດກໍຕາມທີ່ຂັດກັບຂໍ້ກຳນົດເຫຼົ່ານີ້, ພາກສ່ວນທີສາມທີ່ໃຫ້ອະນຸຍາດເນື້ອຫາແກ່ Google ແມ່ນຜູ້ໄດ້ຮັບຜົນປະໂຫຍດພາກສ່ວນທີສາມທີ່ກຳນົດໄວ້ພາຍໃຕ້ຂໍ້ກຳນົດເຫຼົ່ານີ້ທີ່ກ່ຽວຂ້ອງພຽງຢ່າງດຽວກັບຂໍ້ບັນຍັດສະເພາະຂອງຂໍ້ກຳນົດເຫຼົ່ານີ້ທີ່ກ່ຽວພັນກັບເນື້ອຫາຂອງເຂົາເຈົ້າເທົ່ານັ້ນ ("ຂໍ້ບັນຍັດພາກສ່ວນທີສາມ"), ແລະ ເພື່ອຈຸດປະສົງຂອງການເຮັດໃຫ້ພາກສ່ວນທີສາມສາມາດບັງຄັບໃຊ້ສິດທິຂອງເຂົາເຈົ້າໃນເນື້ອຫາດັ່ງກ່າວເທົ່ານັ້ນ. ເພື່ອຄວາມຈະແຈ້ງ, ບໍ່ມີຫຍັງໃນຂໍ້ກຳນົດເຫຼົ່ານີ້ແມ່ນການໃຫ້ສິດຜູ້ໄດ້ຮັບຜົນປະໂຫຍດພາກສ່ວນທີສາມແກ່ຝ່າຍໃດໆ, ກ່ຽວກັບຂໍ້ບັນຍັດຕ່າງໆທີ່ຢູ່ນອກເໜືອຈາກຂໍ້ບັນຍັດພາກສ່ວນທີສາມ ເຊິ່ງລວມມີ ແຕ່ບໍ່ຈຳກັດ ຂໍ້ບັນຍັດ ຫຼື ຂໍ້ຕົກລົງຕ່າງໆທີ່ລວມເອົາໄວ້ໂດຍການອ້າງອີງ ຫຼື ທີ່ອາດຈະຖືກອ້າງອີງເຖິງໂດຍບໍ່ໄດ້ລວມເອົາໄວ້ໃນຂໍ້ກຳນົດເຫຼົ່ານີ້.

ນະໂຍບາຍຂອງ Play. ການໂພສຄຳຕິຊົມໃນ Google Play ແມ່ນຂຶ້ນກັບ ນະໂຍບາຍ ຕໍ່ໄປນີ້. ຖ້າທ່ານຕ້ອງການແຈ້ງການໃຊ້ໃນທາງທີ່ຜິດ ຫຼື ການລະເມີດເນື້ອຫາອື່ນໆ, ກະລຸນາຄລິກ ບ່ອນນີ້.

ເນື້ອຫາທີ່ບົກຜ່ອງ. ເມື່ອເນື້ອຫາມີໃຫ້ແກ່ທ່ານຜ່ານບັນຊີຂອງທ່ານ, ທ່ານຄວນກວດເບິ່ງເນື້ອຫາໃນທັນທີທີ່ເຮັດໄດ້ຕາມຄວາມເໝາະສົມເພື່ອໃຫ້ແນ່ໃຈວ່າມັນໃຊ້ໄດ້ ແລະ ເປັນໄປຕາມທີ່ລະບຸໄວ້ ແລະ ແຈ້ງບອກພວກເຮົາ ຫຼື ຜູ້ໃຫ້ບໍລິການໃນທັນທີທີ່ເຮັດໄດ້ຕາມຄວາມເໝາະສົມ ຖ້າທ່ານພົບເຫັນຂໍ້ຜິດພາດ ຫຼື ຈຸດບົກຜ່ອງ. ເບິ່ງ ນະໂຍບາຍການສົ່ງເງິນຄືນຂອງ Google Play ສຳລັບຂໍ້ມູນເພີ່ມເຕີມ.

ການລຶບອອກ ຫຼື ການບໍ່ມີເນື້ອຫາ. ໂດຍຂຶ້ນກັບຂໍ້ກຳນົດ, ເນື້ອຫາທີ່ທ່ານຊື້ ຫຼື ຕິດຕັ້ງຈະມີໃຫ້ແກ່ທ່ານຜ່ານ Google Play ເປັນໄລຍະເວລາທີ່ທ່ານເລືອກໄວ້, ໃນກໍລະນີການຊື້ ສຳລັບໄລຍະເວລາເຊົ່າ ແລະ ໃນກໍລະນີອື່ນ ດົນເທົ່າທີ່ Google ມີສິດເຮັດໃຫ້ເນື້ອຫາດັ່ງກ່າວມີໃຫ້ແກ່ທ່ານ. ໃນບາງກໍລະນີສະເພາະ (ຕົວຢ່າງ: ຖ້າ Google ສູນເສຍສິດທິທີ່ກ່ຽວຂ້ອງ, ມີການຢຸດເຊົາການບໍລິການ ຫຼື ເນື້ອຫາ, ມີບັນຫາດ້ານຄວາມປອດໄພຮ້າຍແຮງ ຫຼື ມີການລະເມີດຂໍ້ກຳນົດທີ່ນຳໃຊ້ ຫຼື ກົດໝາຍ), Google ອາດຈະລຶບເນື້ອຫາອອກຈາກອຸປະກອນຂອງທ່ານ ຫຼື ຢຸດເຊົາໃຫ້ທ່ານມີການເຂົ້າເຖິງບາງເນື້ອຫາສະເພາະທີ່ທ່ານຊື້ມາ. ສຳລັບເນື້ອຫາທີ່ຂາຍໂດຍ Google Ireland Limited, ທ່ານອາດຈະໄດ້ຮັບການແຈ້ງບອກກ່ຽວກັບການລຶບອອກ ຫຼື ການຢຸດເຊົາດັ່ງກ່າວ, ໃນເວລາທີ່ເປັນໄປໄດ້. ຖ້າທ່ານບໍ່ສາມາດດາວໂຫຼດສຳເນົາຂອງເນື້ອຫາກ່ອນການລຶບອອກ ຫຼື ການຢຸດເຊົາດັ່ງກ່າວ, Google ອາດຈະໃຫ້ສິ່ງໃດໜຶ່ງຕໍ່ໄປນີ້ແກ່ທ່ານ (ກ) ການປ່ຽນເນື້ອຫາໃໝ່ຖ້າເປັນໄປໄດ້ ຫຼື (ຂ) ການຄືນເງິນເຕັມຈຳນວນ ຫຼື ບາງສ່ວນຂອງລາຄາເນື້ອຫານັ້ນ. ຖ້າ Google ສົ່ງເງິນຄືນແກ່ທ່ານ, ການສົ່ງເງິນຄືນຈະແມ່ນການຊົດເຊີຍໜຶ່ງດຽວໃຫ້ແກ່ທ່ານ.

ຫຼາຍບັນຊີ. ຖ້າທ່ານມີບັນຊີ Google ຫຼາຍບັນຊີທີ່ມີຊື່ຜູ້ໃຊ້ຕ່າງກັນ, ໃນບາງກໍລະນີທີ່ທ່ານສາມາດໂອນຍ້າຍເນື້ອຫາອອກຈາກບັນຊີໃດໜຶ່ງ ແລະ ໄປໃສ່ບັນຊີອື່ນໄດ້ ໂດຍມີເງື່ອນໄຂວ່າທ່ານແມ່ນເຈົ້າຂອງແຕ່ລະບັນຊີດັ່ງກ່າວ ແລະ ໂດຍມີເງື່ອນໄຂວ່າ Google ໄດ້ເປີດນຳໃຊ້ຄຸນສົມບັດຂອງການບໍລິການທີ່ກ່ຽວຂ້ອງທີ່ອະນຸຍາດໃຫ້ເຮັດການໂອນຍ້າຍດັ່ງກ່າວ.

ຂີດຈຳກັດການເຂົ້າເຖິງໃນອຸປະກອນ. ໃນບາງຄັ້ງ Google ອາດຈະກຳນົດຂີດຈຳກັດຕໍ່ກັບຈຳນວນອຸປະກອນ ຫຼື ແອັບພລິເຄຊັນຊອບແວທີ່ທ່ານສາມາດໃຊ້ເພື່ອເຂົ້າເຖິງເນື້ອຫາ. ກະລຸນາເຂົ້າເບິ່ງໜ້າ ສູນຊ່ວຍເຫຼືອຂອງ Google Play Music ຂອງພວກເຮົາ ຫຼື ກົດລະບຽບການໃຊ້ Google Play Movies & TV ສຳລັບຂໍ້ມູນເພີ່ມເຕີມກ່ຽວກັບຂີດຈຳກັດເຫຼົ່ານີ້ສຳລັບ Google Play Music ຫຼື Google Play Movies & TV.

ກິດຈະກຳທີ່ອັນຕະລາຍ. ບໍ່ມີການບໍລິການ ຫຼື ເນື້ອຫາໃດໆມີຈຸດປະສົງສຳລັບການໃຊ້ໃນການດຳເນີນສະຖານທີ່ນິວເຄຼຍ, ລະບົບຊ່ວຍຊີວິດ, ການສື່ສານແຈ້ງບອກເຫດສຸກເສີນ, ລະບົບການນຳທາງ ຫຼື ການສື່ສານຂອງເຮືອບິນ, ລະບົບຄວບຄຸມການຈະລາຈອນທາງອາກາດ ຫຼື ກິດຈະກຳອື່ນໆດັ່ງກ່າວ ເຊິ່ງການຂັດຂ້ອງຂອງການບໍລິການ ຫຼື ເນື້ອຫາດັ່ງກ່າວສາມາດນຳໄປສູ່ການເສຍຊີວິດ, ການບາດເຈັບຮ່າງກາຍ ຫຼື ຄວາມເສຍຫາຍທາງວັດຖຸ ຫຼື ສິ່ງແວດລ້ອມ.

Google Play Movies & TV. ສຳລັບລາຍລະອຽດ ແລະ ຂໍ້ຈຳກັດເພີ່ມເຕີມກ່ຽວກັບການເຂົ້າເຖິງ ແລະ ການໃຊ້ Google Play Movies & TV ຂອງທ່ານ, ກະລຸນາເບິ່ງ ກົດລະບຽບການໃຊ້ Google Play Movies & TV.

Google Play Music

Google Play ອະນຸຍາດໃຫ້ທ່ານເປີດເບິ່ງ, ສະແດງຕົວຢ່າງ, ຖ່າຍທອດ, ຊື້, ດາວໂຫຼດ, ແນະນຳ ແລະ ໃຊ້ເພງ ແລະ ເນື້ອຫາທີ່ກ່ຽວຂ້ອງກັບເພງດິຈິຕອນທີ່ຫຼາກຫຼາຍ ເຊັ່ນວ່າ ໄຟລ໌ເພງ, ໄຟລ໌ວິດີໂອເພງ, ເພງຕົວຢ່າງ, ຄລິບ, ຂໍ້ມູນສິນລະປິນ, ຄຳຕິຊົມຂອງຜູ້ໃຊ້, ຄຳຕິຊົມເພງແບບມືອາຊີບຈາກພາກສ່ວນທີສາມ ແລະ ເນື້ອຫາດິຈິຕອນອື່ນໆ ("ຜະລິດຕະພັນເພງ").

ເນື້ອຫາທີ່ເກັບໄວ້. ທ່ານສາມາດໃຊ້ Google Play ເພື່ອເກັບຮັກສາເນື້ອຫາດິຈິຕອນ (ເຊັ່ນວ່າ ໄຟລ໌ເພງ, ຂໍ້ມູນເມຕາເດຕາ ແລະ ໜ້າປົກອາລະບໍ້າທີ່ກ່ຽວຂ້ອງ) ໄວ້ໃນບ່ອນຈັດເກັບຂໍ້ມູນເພງຜ່ານຊອບແວເພງ ຕາມທີ່ກຳນົດໄວ້ແຕ່ລະອັນຢູ່ຂ້າງລຸ່ມ ("ເນື້ອຫາທີ່ເກັບໄວ້"). ເພື່ອຄວາມຈະແຈ້ງ, "ຜະລິດຕະພັນເພງ" ບໍ່ໍລວມເອົາເນື້ອຫາທີ່ເກັບຮັກສາໄວ້. ເນື້ອຫາທີ່ເກັບໄວ້ອາດຈະລວມມີທັງໄຟລ໌ທີ່ທ່ານອັບໂຫຼດໂດຍກົງໃສ່ບ່ອນຈັດເກັບຂໍ້ມູນເພງ ຫຼື ໄຟລ໌ທີ່ Google "ສະແກນ ແລະ ຈັບຄູ່" ກັບໄຟລ໌ທີ່ເກັບໄວ້ພາຍໃນເຄື່ອງໃນອຸປະກອນຂອງທ່ານ.

ການບໍລິການຄັງເກັບເພງ. Google Play ອາດຈະໃຫ້ທ່ານມີການເຂົ້າເຖິງ (a) ພື້ນທີ່ເຊີບເວີທີ່ທ່ານສາມາດໃຊ້ເກັບເພງ ແລະ ໄຟລ໌ຂໍ້ມູນທີ່ກ່ຽວຂ້ອງ ລວມທັງຜະລິດຕະພັນເພງ ແລະ ເນື້ອຫາທີ່ເກັບໄວ້ ("ບ່ອນຈັດເກັບຂໍ້ມູນເພງ") ຫຼື (b) ແອັບພລິເຄຊັນຊອບແວ (ລວມທັງເວັບ, ເດັສທັອບ ແລະ ແອັບພລິເຄຊັນມືຖື) ແລະ ການບໍລິການທີ່ກ່ຽວຂ້ອງທີ່ອະນຸຍາດໃຫ້ທ່ານອັບໂຫຼດ, ຈັດການ, ເຂົ້າເຖິງ ແລະ ຟັງເພງຜ່ານບ່ອນຈັດເກັບຂໍ້ມູນເພງໄດ້ ("ຊອບແວເພງ"). ບ່ອນຈັດເກັບຂໍ້ມູນເພງ ແລະ ຊອບແວເພງຖືກເອີ້ນລວມກັນໃນຂໍ້ກຳນົດເຫຼົ່ານີ້ເປັນ "ການບໍລິການຄັງເກັບເພງ".

ການໃຊ້ການບໍລິການຄັງເກັບເພງ. ໂດຍການເກັບຮັກສາຜະລິດຕະພັນເພງ ແລະ ເນື້ອຫາທີ່ເກັບໄວ້ໃນບ່ອນຈັດເກັບຂໍ້ມູນເພງ, ທ່ານກຳລັງເກັບຮັກສາສຳເນົາສະເພາະຂອງເນື້ອຫາດັ່ງກ່າວໄວ້ ແລະ ຮ້ອງຂໍໃຫ້ Google ຮັກສາມັນໄວ້ໃນນາມຕາງໜ້າໃຫ້ທ່ານ ແລະ ເຮັດໃຫ້ມັນເຂົ້າເຖິງໄດ້ຕໍ່ກັບທ່ານຜ່ານບັນຊີຂອງທ່ານໃນ Google Play. ໂດຍການໃຊ້ການບໍລິການຄັງເກັບເພງ, ທ່ານກຳລັງຮ້ອງຂໍໃຫ້ Google ເຮັດໃຫ້ທຸກຟັງຊັນ ແລະ ຄຸນສົມບັດທີ່ຈຳເປັນຂອງການບໍລິການຄັງເກັບເພງມີໃຫ້ແກ່ທ່ານ ເພື່ອອຳນວຍຄວາມສະດວກການໃຊ້ຜະລິດຕະພັນເພງ ແລະ ເນື້ອຫາທີ່ເກັບໄວ້ຂອງທ່ານ. ທ່ານເຂົ້າໃຈວ່າ ໃນການດຳເນີນຂັ້ນຕອນທາງເຕັກນິກທີ່ຈຳເປັນຕາມການຊີ້ບອກຂອງທ່ານເພື່ອໃຫ້ການບໍລິການຄັງເກັບເພງແກ່ທ່ານ, Google ອາດຈະ (a) ໂອນຍ້າຍຜະລິດຕະພັນເພງ ແລະ ເນື້ອຫາທີ່ເກັບໄວ້ຜ່ານເຄືອຂ່າຍຕ່າງໆ ແລະ ໃນສື່ຫຼາກຫຼາຍຮູບແບບ ແລະ (b) ເຮັດການປ່ຽນແປງຕໍ່ກັບຜະລິດຕະພັນເພງ ແລະ ເນື້ອຫາທີ່ເກັບໄວ້ຕາມທີ່ຈຳເປັນເພື່ອຢືນຢັນ ແລະ ປັບມັນໃຫ້ເຂົ້າກັບຂໍ້ກຳນົດດ້ານເຕັກນິກຂອງການເຊື່ອມຕໍ່ເຄືອຂ່າຍ, ອຸປະກອນ, ການບໍລິການ ຫຼື ສື່. ທ່ານຢືນຢັນ ແລະ ຮັບປະກັນກັບ Google ວ່າທ່ານມີສິດທິທີ່ຈຳເປັນໃນການເກັບຮັກສາເນື້ອຫາທີ່ເກັບໄວ້ໃນບ່ອນຈັດເກັບຂໍ້ມູນເພງທີ່ທ່ານຊີ້ບອກໃຫ້ Google ອັບໂຫຼດ ຫຼື ເກັບຮັກສາໄວ້ໃນບ່ອນຈັດເກັບຂໍ້ມູນເພງ ແລະ ໃນການດຳເນີນການຕ່າງໆທີ່ອະທິບາຍໄວ້ໃນຂໍ້ນີ້.

ການບໍລິການສະໝັກໃຊ້ອື່ນຂອງ Google. ການໃຊ້ Google Play ແລະ ຜະລິດຕະພັນການສະໝັກໃຊ້ເພງໃນ Google Play ຂອງທ່ານຖືກຄວບຄຸມພຽງຢ່າງດຽວໂດຍຂໍ້ກຳນົດເຫຼົ່ານີ້ ແລະ ບໍ່ແມ່ນຂໍ້ກຳນົດຂອງຜະລິດຕະພັນອື່ນໆຂອງ Google ລວມທັງຜະລິດຕະພັນອື່ນໆຂອງ Google ທີ່ທ່ານໄດ້ຮັບການເຂົ້າເຖິງການສະໝັກໃຊ້ເພງໃນ Google Play.

Google Play Newsstand.

ຂໍ້ມູນທີ່ Google ເປີດເຜີຍກັບຜູ້ຈັດພິມວາລະສານ. ຖ້າທ່ານຊື້ການສະໝັກໃຊ້ວາລະສານບໍ່ວ່າຈະເປັນໄລຍະເວລາເທົ່າໃດໃນ Google Play, Google ອາດຈະເປີດເຜີຍຊື່, ທີ່ຢຸ່ອີເມວ, ທີ່ຢຸ່ທາງໄປສະນີ ແລະ ຕົວລະບຸຕົວສະເພາະກັບຜູ້ຈັດພິມວາລະສານນັ້ນ. ໃນຖານະເປັນຜູ້ສະໝັກໃຊ້ວາລະສານ, Google ອາດຈະເປີດເຜີຍປະຫວັດການອ່ານຂອງທ່ານພາຍໃນວາລະສານກັບຜູ້ຈັດພິມວາລະສານນັ້ນ. Google ໄດ້ຕົກລົງເຫັນດີກັບຜູ້ຈັດພິມວາລະສານວ່າຜູ້ຈັດພິມວາລະສານຈະໃຊ້ຂໍ້ມູນນີ້ອີງຕາມນະໂຍບາຍຄວາມເປັນສ່ວນຕົວຂອງຜູ້ຈັດພິມນັ້ນ. ທ່ານຈະໄດ້ຮັບໂອກາດໃນການເລືອກບໍ່ຮັບເອົາການສື່ສານແຈ້ງບອກຈາກຜູ້ຈັດພິມທີ່ບໍ່ກ່ຽວຂ້ອງກັບການສະໝັກໃຊ້ທີ່ທ່ານຊື້ໄດ້ ແລະ ເລືອກບໍ່ຮັບເອົາການສື່ສານທາງຕະຫຼາດຈາກພາກສ່ວນທີສາມໄດ້ໃນເວລາທີ່ທ່ານຊື້ການສະໝັກໃຊ້ຂອງທ່ານ. ຖ້າທ່ານຊື້ວາລະສານສະບັບດຽວໃນ Google Play, Google ອາດຈະໃຫ້ລະຫັດໄປສະນີຂອງທ່ານແກ່ຜູ້ຈັດພິມວາລະສານ. ນອກນັ້ນ ພວກເຮົາຍັງໃຫ້ຂໍ້ມູນການຂາຍກ່ຽວກັບການຊື້ວາລະສານແກ່ຜູ້ຈັດພິມວາລະສານນຳອີກ.

ການພິສູດຢືນຢັນການສະໝັກໃຊ້ສະບັບພິມ. ຖ້າທ່ານກຳລັງເຂົ້າເຖິງການສະໝັກໃຊ້ໃນ Google Play Newsstand ຜ່ານການສະໝັກໃຊ້ສະບັບພິມທີ່ມີຢູ່ແລ້ວຈາກຜູ້ຈັດພິມວາລະສານນັ້ນ, ພວກເຮົາອາດຈະຮ້ອງຂໍໃຫ້ຜູ້ໃຫ້ບໍລິການພາກສ່ວນທີສາມພິສູດຢືນຢັນການສະໝັກໃຊ້ສະບັບພິມຂອງທ່ານນຳຜູ້ຈັດພິມວາລະສານດັ່ງກ່າວ ແລະ ພວກເຮົາອາດຈະຮ້ອງຂໍເອົາຂໍ້ມູນສະເພາະທີ່ກ່ຽວຂ້ອງກັບການສະໝັກໃຊ້ສະບັບພິມຂອງທ່ານເພື່ອເຮັດການພິສູດຢືນຢັນ. Google ຈະໃຊ້ຂໍ້ມູນນີ້ໂດຍປະຕິບັດຕາມນະໂຍບາຍຄວາມເປັນສ່ວນຕົວຂອງ Google.