Jump to Content

Jump to Content

ຂໍ້ກຳນົດການບໍລິການຂອງ Google Play

ວັນທີ 01 ກໍລະກົດ, 2024 (ເບິ່ງເວີຊັນທີ່ເກັບໄວ້ໃນແຟ້ມ)

ພວກເຮົາກຳລັງອັບເດດຂໍ້ກຳນົດບໍລິການ Play ໃນວັນທີ 01 ກໍລະກົດ, 2024. ຈົນກວ່າຈະຮອດວັນທີດັ່ງກ່າວ, ຂໍ້ກຳນົດລຸ່ມນີ້ຈະຍັງມີຜົນນຳໃຊ້. ກະລຸນາເບິ່ງຕົວຢ່າງຂອງຂໍ້ກຳນົດທີ່ກຳລັງຈະມີຜົນ.

1. ຄຳແນະນຳ

ຂໍ້ກຳນົດທີ່ນຳໃຊ້ (Applicable Terms). ຂໍຂອບໃຈທີ່ໃຊ້ Google Play. Google Play ແມ່ນການບໍລິການທີ່ສະໜອງໃຫ້ໂດຍ Google LLC ("Google", "ພວກເຮົາ" ຫຼື "ເຮົາ"), ເຊິ່ງມີສຳນັກງານຕັ້ງຢູ່ 1600 Amphitheatre Parkway, Mountain View California 94043, USA. ການໃຊ້ Google Play ແລະ ແອັບຂອງທ່ານ (ລວມທັງ Android Instant Apps), ບໍລິການຂອງລະບົບ, ເກມ,ຮູບເງົາ, ປຶ້ມ, ວາລະສານ ຫຼື ເນື້ອໃນດິຈິຕອນ ຫຼື ການບໍລິການອື່ນໆ (ຕໍ່ໄປເອີ້ນວ່າ "ເນື້ອໃນ") ທີ່ມີໃຫ້ຜ່ານການບໍລິການຂອງ Google Play ແມ່ນຂຶ້ນກັບຂໍ້ກຳນົດການບໍລິການຂອງ Google Play ("ຂໍ້ກຳນົດການບໍລິການຂອງ Play") ແລະ ຂໍ້ກຳນົດການບໍລິການຂອງ Google ("ຂໍ້ກຳນົດການບໍລິການຂອງ Google") (ທັງໝົດລວມກັນເອີ້ນວ່າ "ຂໍ້ກຳນົດ"). Google Play ແມ່ນ "ການບໍລິການ" ຕາມທີ່ອະທິບາຍໄວ້ໃນຂໍ້ກຳນົດການບໍລິການຂອງ Google. ຖ້າຫາກມີການຂັດກັນລະຫວ່າງຂໍ້ກຳນົດການບໍລິການຂອງ Play ແລະ ຂໍ້ກຳນົດການບໍລິການຂອງ Google, ແມ່ນໃຫ້ຖືວ່າຂໍ້ກຳນົດການບໍລິການຂອງ Play ມີຜົນເໜືອກວ່າ..

2. ການໃຊ້ Google Play ຂອງທ່ານ

ການເຂົ້າເຖິງ ແລະ ການໃຊ້ເນື້ອໃນ (Access to and Use of Content). ທ່ານສາມາດໃຊ້ Google Play ເພື່ອເປີດເບິ່ງ, ຊອກຫາ, ຮັບຊົມ, ຖ່າຍທອດ ຫຼື ດາວໂຫຼດເນື້ອໃນສຳລັບມືຖື, ຄອມພິວເຕີ, ໂທລະພາບ, ໂມງ ຫຼື ອຸປະກອນອື່ນໆທີ່ຮອງຮັບ ("ອຸປະກອນ"). ເພື່ອນຳໃຊ້ Google Play, ທ່ານຈະຕ້ອງມີອຸປະກອນທີ່ສອດຄ່ອງກົງກັບ ຂໍ້ກຳນົດດ້ານລະບົບ ແລະ ຄວາມເຂົ້າກັນໄດ້ສຳລັບເນື້ອໃນທີ່ກ່ຽວຂ້ອງ, ການເຂົ້າເຖິງອິນເຕີເນັດທີ່ໃຊ້ງານໄດ້ ແລະ ຊອບແວທີ່ເຂົ້າກັນໄດ້. ການມີຄວາມພ້ອມໃຫ້ນຳໃຊ້ຂອງເນື້ອໃນ ແລະ ຄຸນສົມບັດຕ່າງໆຈະແຕກຕ່າງກັນໃນແຕ່ລະປະເທດ ແລະ ບໍ່ແມ່ນວ່າທຸກເນື້ອໃນ ຫຼື ຄຸນສົມບັດຈະສາມາດໃຊ້ໄດ້ໃນປະເທດຂອງທ່ານ. ບາງເນື້ອໃນອາດຈະສາມາດແບ່ງປັນກັບສະມາຊິກຄອບຄົວໄດ້. ເນື້ອໃນອາດຈະຖືກສະໜອງໃຫ້ໂດຍ Google ຫຼືບຸກຄົນທີສາມທີ່ບໍ່ໄດ້ກ່ຽວຂ້ອງກັບ Google. Google ບໍ່ຮັບຜິດຊອບ ແລະ ບໍ່ອະນຸມັດຮັບຮອງເນື້ອໃນຕ່າງໆທີ່ມີໃຫ້ບໍລິການນຳໃຊ້ຜ່ານ Google Play ທີ່ມາຈາກແຫຼ່ງອື່ນໆທີ່ບໍ່ແມ່ນ Google.

ຂໍ້ຈຳກັດດ້ານອາຍຸ (Age Restrictions). ໃນການນຳໃຊ້ Google Play, ທ່ານຕ້ອງມີບັນຊີ Google ທີ່ໃຊ້ໄດ້ ("ບັນຊີ Google"), ເຊິ່ງຂຶ້ນກັບ ຂໍ້ຈຳກັດດ້ານອາຍຸ ຕໍ່ໄປນີ້. ຖ້າຫາກທ່ານແມ່ນຢູ່ໃນສະຖານະເດັກໃນປະເທດຂອງທ່ານ, ທ່ານຕ້ອງໄດ້ຮັບການອະນຸຍາດຈາກພໍ່ແມ່ ຫຼື ຜູ້ປົກຄອງຕາມກົດໝາຍຂອງທ່ານເພື່ອນຳໃຊ້ Google Play ແລະ ຍອມຮັບຂໍ້ກຳນົດ. ທ່ານຕ້ອງປະຕິບັດຕາມຂໍ້ຈຳກັດດ້ານອາຍຸເພີ່ມເຕີມທີ່ອາດຈະຜົນກັບການໃຊ້ເນື້ອ ຫຼື ຄຸນສົມບັດສະເພາະໃນ Google Play. ຜູ້ຈັດການຄອບຄົວ ແລະ ສະມາຊິກຄອບຄົວຕ້ອງປະຕິບັດຕາມ ຂໍ້ກຳນົດເພີ່ມເຕີມ ເຫຼົ່ານີ້ເຊັ່ນກັນ.

ຄ່າທຳນຽມຂອງບຸກຄົນທີສາມ (Third-Party Fees). ທ່ານຈະຕ້ອງຮັບຜິດຊອບຕໍ່ຄ່າທຳນຽມການເຂົ້າເຖິງ ຫຼື ຄ່າຂໍ້ມູນທີ່ເກີດຈາກບຸກຄົນທີສາມ (ເຊັ່ນວ່າ ຜູ້ໃຫ້ບໍລິການອິນເຕີເນັດ ຫຼື ຜູ້ໃຫ້ບໍລິການມືຖືຂອງທ່ານ) ທີ່ກ່ຽວຂ້ອງກັບການໃຊ້ ແລະ ການເບິ່ງເນື້ອໃນ ແລະ Google Play ຂອງທ່ານ.

ການອັບເດດ (Updates). Google Play, ຫ້ອງສະໝຸດການຊ່ວຍເຫຼືອທີ່ກ່ຽວຂ້ອງ ຫຼື ເນື້ອໃນ ອາດຈະຈຳເປັນຕ້ອງໄດ້ຮັບການອັບເດດ, ຕົວຢຢ່າງ: ເພື່ອແກ້ໄຂຈຸດບົກຜ່ອງ, ປັບປຸງຟັງຊັນຕ່າງໆ, ປລັກອິນທີ່ບໍ່ເຫັນ ແລະ ເວີຊັນໃໝ່ (ລວມກັນເອີ້ນວ່າ "ການອັບເດດ"). ການອັບເດດດັ່ງກ່າວອາດຈະຈຳເປັນເພື່ອໃຫ້ທ່ານໃຊ້ Google Play ຫຼື ເຂົ້າເຖິງ, ດາວໂຫຼດ ຫຼື ໃຊ້ເນື້ອໃນໄດ້. ໂດຍການເຫັນດີນຳຂໍ້ກຳນົດເຫຼົ່ານີ້ ແລະ ການໃຊ້ Google Play, ສະແດງວ່າທ່ານເຫັນດີຮັບເອົາການອັບເດດດັ່ງກ່າວໂດຍອັດຕະໂນມັດ. ທ່ານອາດຈະຈັດການການອັບເດດຕໍ່ກັບບາງເນື້ອໃນສະເພາະຜ່ານການຕັ້ງຄ່າໃນ Google Play ໄດ້. ແນວໃດກໍຕາມ, ຖ້າຫາກມີການກຳນົດວ່າການອັບເດດຈະແກ້ໄຂຄວາມສ່ຽງດ້ານຄວາມປອດໄພທີ່ສຳຄັນ ຫຼື ບັນຫາດ້ານການດຳເນີນການທີ່ສຳຄັນທີ່ກ່ຽວຂ້ອງກັບເນື້ອໃນ ຫຼື ຈະຊ່ວຍປ້ອງກັນການຄຸກຄາມ, ການອັບເດດອາດຈະຖືກເຮັດສຳເລັດໂດຍບໍ່ຄຳນຶງເຖິງການຕັ້ງຄ່າການອັບເດດຂອງທ່ານໃນ Google Play ຫຼື ອຸປະກອນຂອງທ່ານ. ຖ້າຮ້ານຄ້າແອັບອື່ນໃດໜຶ່ງພະຍາຍາມອັບເດດເນື້ອໃນທີ່ດາວໂຫຼດຈາກ Google Play ໃນເບື້ອງຕົ້ນ, ທ່ານອາດຈະໄດ້ຮັບຄຳເຕືອນ ຫຼື ອາດຈະມີການຂັດຂວາງການອັບເດດດັ່ງກ່າວໄວ້ທັງໝົດ.

ຂໍ້ມູນກ່ຽວກັບທ່ານ (Information about You).ນະໂຍບາຍຄວາມເປັນສ່ວນຕົວ ຂອງ Google ອະທິບາຍເຖິງວິທີທີ່ພວກເຮົາປະຕິບັດຕໍ່ຂໍ້ມູນສ່ວນຕົວຂອງທ່ານ ແລະ ປົກປ້ອງຄວາມເປັນສ່ວນຕົວຂອງທ່ານໃນເວລານຳໃຊ້ Google Play. Google ອາດຈະຈຳເປັນຕ້ອງໃຫ້ຂໍ້ມູນສ່ວນຕົວຂອງທ່ານ ເຊັ່ນວ່າ ຊື່ ແລະ ທີ່ຢູ່ອີເມວ ແກ່ຜູ້ໃຫ້ບໍລິການຕ່າງໆເພື່ອຈຸດປະສົງຂອງການປະມວນຜົນທຸລະກຳຂອງທ່ານ ຫຼື ສະໜອງເນື້ອໃນໃຫ້ແກ່ທ່ານ. ຜູ້ໃຫ້ບໍລິການເຫັນດີທີ່ຈະໃຊ້ຂໍ້ມູນນີ້ໂດຍປະຕິບັດຕາມນະໂຍບາຍຄວາມເປັນສ່ວນຕົວຂອງຕົນ.

ຖ້າຫາກທ່ານເປັນສ່ວນໜຶ່ງຂອງກຸ່ມຄອບຄົວໃນ Google Play, ສະມາຊິກຄອບຄົວຂອງທ່ານໃນກຸ່ມຄອບຄົວນັ້ນຈະສາມາດເຫັນບາງຂໍ້ມູນສະເພາະກ່ຽວກັບທ່ານໄດ້. ຖ້າທ່ານແມ່ນຜູ້ຈັດການຄອບຄົວຂອງກຸ່ມຄອບຄົວໃນ Google Play, ສະມາຊິກຄອບຄົວທີ່ທ່ານເຊີນເຂົ້າຮ່ວມຄອບຄົວນັ້ນຈະເຫັນຊື່, ຮູບ ແລະ ທີ່ຢູ່ອີເມວຂອງທ່ານ. ຖ້າທ່ານເຂົ້າຮ່ວມກຸ່ມຄອບຄົວໃນຖານະເປັນສະມາຊິກຄອບຄົວ, ສະມາຊິກອື່ນໃນຄອບຄົວຈະສາມາດເຫັນຊື່, ຮູບ ແລະ ທີ່ຢູ່ອີເມວຂອງທ່ານ. ຜູ້ຈັດການຄອບຄົວຂອງທ່ານອາດຈະເຫັນອາຍຸຂອງທ່ານນຳອີກ ແລະ ຈະເຫັນບັນທຶກການຊື້ທັງໝົດທີ່ທ່ານເຮັດໂດຍໃຊ້ວິທີການຈ່າຍເງິນຂອງຄອບຄົວທີ່ກຳນົດໄວ້ ລວມທັງລາຍລະອຽດຂອງເນື້ອໃນທີ່ຊື້. ຖ້າເນື້ອໃນມີໃຫ້ແບ່ງປັນໃນຄອບຄົວ ແລະ ທ່ານແບ່ງປັນເນື້ອໃນນັ້ນກັບກຸ່ມຄອບຄົວຂອງທ່ານ, ສະມາຊິກຄອບຄົວທຸກຄົນຈະສາມາດເຂົ້າເຖິງເນື້ອໃນນັ້ນໄດ້ ແລະ ເຫັນວ່າທ່ານເປັນຄົນຊື້ມັນ.

ການເຂົ້າເຖິງບັນຊີທີ່ບໍ່ໄດ້ຮັບອະນຸຍາດ (Unauthorized Access to Accounts). ທ່ານຕ້ອງຮັກສາລາຍລະອຽດບັນຊີຂອງທ່ານໃຫ້ປອດໄພ ແລະ ຕ້ອງບໍ່ເປີດເຜີຍກັບຄົນອື່ນ. ທ່ານຕ້ອງບໍ່ເກັບລວບລວມເອົາ ຫຼື ເກັບໂຮມຂໍ້ມູນສ່ວນຕົວໃດໜຶ່ງຂອງຜູ້ໃຊ້ Google Play ຫຼື ຜູ້ໃຊ້ການບໍລິການອື່ນໆຂອງ Google ໃດໆກໍຕາມຜ່ານ Google Play ລວມທັງຊື່ບັນຊີ.

ບັນຊີທີ່ຖືກປິດນຳໃຊ້ (Disabled Accounts). ຖ້າ Google ປິດການເຂົ້າເຖິງບັນຊີຂອງທ່ານໂດຍປະຕິບັດຕາມຂໍ້ກຳນົດ (ຕົວຢ່າງ: ຖ້າທ່ານລະເມີດຂໍ້ກຳນົດ), ທ່ານອາດຈະຖືກປ້ອງກັນບໍ່ໃຫ້ເຂົ້າເຖິງ Google Play, ລາຍລະອຽດບັນຊີຂອງທ່ານ ຫຼື ໄຟລ໌ຕ່າງໆໃດໜຶ່ງ ຫຼື ເນື້ອໃນອື່ນໆທີ່ເກັບໄວ້ໃນບັນຊີຂອງທ່ານ. ເບິ່ງ ສູນຊ່ວຍເຫຼືອ ສຳລັບຂໍ້ມູນເພີ່ມເຕີມ. ຖ້າທ່ານແມ່ນຜູ້ຈັດການຄອບຄົວຂອງຄອບຄົວໃນ Google Play ແລະ Google ປິດການເຂົ້າເຖິງບັນຊີຂອງທ່ານ, ສະມາຊິກຄອບຄົວຂອງທ່ານອາດຈະສູນເສຍການເຂົ້າເຖິງຄຸນສົມບັດສຳລັບຄອບຄົວທີ່ຈຳເປັນຕ້ອງມີກຸ່ມຄອບຄົວ ເຊັ່ນວ່າ ວິທີການຊໍາລະເງິນຂອງຄອບຄົວ, ການສະໝັກໃຊ້ຂອງຄອບຄົວ ຫຼື ເນື້ອໃນທີ່ແບ່ງປັນໂດຍສະມາຊິກຄອບຄົວ. ຖ້າທ່ານເປັນສະມາຊິກຂອງຄອບຄົວໃນ Google Play ແລະ Google ປິດນຳໃຊ້ບັນຊີຂອງທ່ານ, ສະມາຊິກຄອບຄົວຂອງທ່ານຈະສູນເສຍການເຂົ້າເຖິງເນື້ອໃນທີ່ທ່ານແບ່ງປັນກັບເຂົາເຈົ້າ.

ການປ້ອງກັນມາລແວ (Malware protection). ເພື່ອປົກປ້ອງທ່ານຈາກຊອບແວບຸກຄົນທີສາມທີ່ເປັນອັນຕະລາຍ, URL ແລະ ບັນຫາດ້ານຄວາມປອດໄພອື່ນໆ, Google ອາດຈະຮັບເອົາຂໍ້ມູນກ່ຽວກັບການເຊື່ອມຕໍ່ເຄືອຂ່າຍຂອງ ອຸປະກອນ ຂອງທ່ານ, URL ທີ່ອາດຈະເປັນອັນຕະລາຍ, ລະບົບປະຕິບັດການ ແລະ ແອັບຕ່າງໆທີ່ຕິດຕັ້ງຢູ່ໃນອຸປະກອນຂອງທ່ານຜ່ານ Google Play ຫຼື ຈາກແຫຼ່ງອື່ນໆ. Google ອາດຈະແຈ້ງເຕືອນທ່ານຖ້າຫາກເຫັນວ່າແອັບ ຫຼື URL ໃດໜຶ່ງບໍ່ປອດໄພ ຫຼື Google ອາດຈະລຶບອອກ ຫຼື ບລັອກການຕິດຕັ້ງຢູູ່ໃນອຸປະກອນຂອງທ່ານ ຖ້າຮູ້ວ່າເປັນອັນຕະລາຍຕໍ່ກັບອຸປະກອນ, ຂໍ້ມູນ ຫຼື ຜູ້ໃຊ້. ທ່ານສາມາດເລືອກປິດນຳໃຊ້ບາງການປົກປ້ອງເຫຼົ່ານີ້ໄດ້ຢູ່ໃນການຕັ້ງຄ່າໃນອຸປະກອນຂອງທ່ານ, ແນວໃດກໍຕາມ, Google ອາດຈະສືບຕໍ່ຮັບເອົາຂໍ້ມູນກ່ຽວກັບແອັບທີ່ຕິດຕັ້ງຜ່ານ Google Play ແລະ ອາດຈະມີການສືບຕໍ່ວິເຄາະແອັບທີ່ຕິດຕັ້ງໃນອຸປະກອນຂອງທ່ານຈາກແຫຼ່ງອື່ນໆເພື່ອເບິ່ງບັນຫາຄວາມປອດໄພ ໂດຍບໍ່ສົ່ງຂໍ້ມູນໃຫ້ Google.

ແອັບພ້ອມໃຊ້ງານຂອງ Android (Android Instant Apps). ໃນເວລາຄລິກໃສ່ລິ້ງໃນອຸປະກອນຂອງທ່ານ, Google Play ອາດຈະກວດເບິ່ງວ່າມີແອັບພ້ອມໃຊ້ຫຼືບໍ່ ແລະ ຖ້າມີ, ແມ່ນໃຫ້ເປີດລິ້ງນັ້ນຢູ່ພາຍໃນແອັບພ້ອມໃຊ້. ລະຫັດໃດໜຶ່ງທີ່ຈຳເປັນໃນການເປີດສ່ວນຕ່າງໆຂອງແອັບພ້ອມໃຊ້ທີ່ທ່ານເຂົ້າເຖິງຈະຖືກດາວໂຫຼດໃສ່ອຸປະກອນຂອງທ່ານ ແລະ ຮັກສາເກັບໄວ້ແບບຊົ່ວຄາວ. ສາມາດເບິ່ງລາຍລະອຽດແອັບສຳລັບແອັບພ້ອມໃຊ້ໄດ້ໃນຮ້ານຄ້າ Google Play. ຂໍ້ມູນ ແລະ ການຕັ້ງຄ່າແອັບພ້ອມໃຊ້ຂອງ Android ຖືກຊິ້ງເຂົ້າກັບອຸປະກອນທີ່ເຂົ້າສູ່ລະບົບດ້ວຍບັນຊີ Google ຂອງທ່ານ. ທ່ານສາມາດເລືອກທີ່ຈະປິດນຳໃຊ້ແອັບພ້ອມໃຊ້ຂອງ Android ໃນການຕັ້ງຄ່າຢຸ່ໃນອຸປະກອນຂອງທ່ານ.

ການປ່ຽນແປງຕໍ່ກັບຂໍ້ກຳນົດເຫຼົ່ານີ້ (Changes to these Terms). ຖ້າຂໍ້ກຳນົດການບໍລິການຂອງ Play ມີການປ່ຽນແປງ, ທ່ານຈະໄດ້ຮັບການແຈ້ງບອກລ່ວງໜ້າຢ່າງໜ້ອຍ 30 ມື້ ແລະ ຂໍ້ກຳນົດການບໍລິການຂອງ Play ໃໝ່ຈະມີຜົນນຳໃຊ້ຫຼັງຈາກໄລຍະເວລາແຈ້ງບອກດັ່ງກ່າວ. ການສືບຕໍ່ໃຊ້ Google Play ຂອງທ່ານຫຼັງຈາກໄລຍະການແຈ້ງບອກດັ່ງກ່າວຈະຊີ້ບອກວ່າທ່ານຍອມຮັບຂໍ້ກຳນົດການບໍລິການຂອງ Play ໃໝ່. ຂໍ້ກຳນົດການບໍລິການຂອງ Play ໃໝ່ຈະນຳໃຊ້ກັບການໃຊ້ທຸກເນື້ອໃນທັງໝົດຂອງທ່ານ (ລວມທັງເນື້ອໃນທີ່ທ່ານໄດ້ຕິດຕັ້ງ ຫຼື ຊື້ໃນເມື່ອກ່ອນ) ແລະ ທັງໝົດທີ່ຕິດຕັ້ງ ຫຼື ຊື້ໃນເວລາຕໍ່ມາ. ຖ້າທ່ານບໍ່ເຫັນດີຕໍ່ການປ່ຽນແປງດັ່ງກ່າວ, ທ່ານຈະມີໂອກາດດາວໂຫຼດເນື້ອໃນທີ່ທ່ານຊື້ ຫຼື ຕິດຕັ້ງໄວ້ກ່ອນໜ້ານີ້ ແລະ ຢຸດເຊົາການໃຊ້ Google Play ຂອງທ່ານ. ທ່ານອາດຈະສືບຕໍ່ເບິ່ງສຳເນົາຂອງເນື້ອໃນນັ້ນໃນອຸປະກອນຂອງທ່ານໂດຍປະຕິບັດຕາມຂໍ້ກຳນົດການບໍລິການຂອງ Play ສະບັບລ້າສຸດທີ່ທ່ານຍອມຮັບໄດ້.

3. ການຊື້ ແລະ ການຊໍາລະເງິນ (Purchases and Payments)

ເນື້ອໃນຟຣີ (Free Content). Google ອາດຈະອະນຸຍາດໃຫ້ທ່ານດາວໂຫຼດ, ເບິ່ງ ຫຼື ໃຊ້ເນື້ອໃນໂດຍບໍ່ເສຍຄ່າຢູ່ໃນ Google Play. ອາດຈະມີຂໍ້ຈຳກັດເພີ່ມເຕີມໃນການເຂົ້າເຖິງ ແລະ ການໃຊ້ບາງເນື້ອໃນຟຣີສະເພາະ.

ການຊື້ເນື້ອໃນ (Purchase of Content). ໃນເວລາທີ່ທ່ານຊື້ເນື້ອໃນຢູ່ໃນ ຫຼື ໂດຍໃຊ້ Google Play ທ່ານຈະລົງນາມໃນສັນຍາຊື້ຂາຍແຍກຕ່າງຫາກອີງຕາມຂໍ້ກຳນົດເຫຼົ່ານີ້ (ຕາມຄວາມເໝາະສົມ) ກັບຜູ້ຂາຍທີ່ຈະແມ່ນ:

(a) Google Digital Inc.; ຫຼື

(b) ຜູ້ໃຫ້ບໍລິການເນື້ອໃນ (ເອີ້ນວ່າ "ຜູ້ໃຫ້ບໍລິການ"), (ລວມທັງບ່ອນທີ່ Google Digital Inc. ເຮັດໜ້າທີ່ເປັນຕົວແທນໃຫ້ແກ່ຜູ້ໃຫ້ບໍລິການ.

ສັນຍາຊື້ຂາຍແຍກຕ່າງຫາກແມ່ນເປັນສ່ວນເພີ່ມຂອງຂໍ້ກຳນົດເຫຼົ່ານີ້.

ສຳລັບການຂາຍທີ່ Google ເຮັດໜ້າທີ່ເປັນຕົວແທນໃຫ້ແກ່ຜູ້ໃຫ້ບໍລິການ, ຂໍ້ຄວາມທີ່ໃນຂໍ້ກຳນົດການບໍລິການຂອງ Google ທີ່ບອກວ່າຂໍ້ກຳນົດການບໍລິການຂອງ Google "ບໍ່ສ້າງສິດທິຜູ້ໄດ້ຮັບຜົນປະໂຫຍດຂອງບຸກຄົນທີສາມໃດໜຶ່ງ", ຈະບໍ່ມີຜົນຕໍ່ກັບການໃຊ້ Google Play ຂອງທ່ານ.

ສັນຍາສຳລັບການຊື້ ແລະ ການໃຊ້ເນື້ອໃນຖືວ່າສຳເລັດໄດ້ກໍຕໍ່ເມື່ອທ່ານໄດ້ຮັບອີເມວຈາກ Google ທີ່ຢືນຢັນການຊື້ເນື້ອໃນນັ້ນຂອງທ່ານ ແລະ ການປະຕິບັດສັນຍານີ້ເລີ່ມໃນທັນທີທີ່ການຊື້ສຳເລັດ.

ສັ່ງຊື້ລ່ວງໜ້າ (Pre-orders). ເມື່ອທ່ານສັ່ງຊື້ເນື້ອໃນລ່ວງໜ້າ, ສັນຍາຂອງທ່ານສຳລັບການຊື້ ແລະ ການໃຊ້ລາຍການນັ້ນຖືວ່າສຳເລັດເມື່ອເນື້ອໃນນັ້ນມີພ້ອມໃຫ້ບໍລິການແກ່ທ່ານ ແລະ ທ່ານຈະຖືກຮຽກເກັບເງິນສຳລັບການຊື້ໃນເວລານັ້ນ. ທ່ານສາມາດຍົກເລີກຄຳສັ່ງຊື້ລ່ວງໜ້າຂອງທ່ານໄດ້ທຸກເວລາຈົນເຖິງທີ່ເນື້ອໃນມີພ້ອມໃຫ້ແກ່ທ່ານ. ພວກເຮົາຈຳເປັນຕ້ອງຍົກເລີກຄຳສັ່ງຊື້ຂອງທ່ານຖ້າເນື້ອໃນຖືກຖອນອອກຈາກການຂາຍຜ່ານ Google Play ກ່ອນທີ່ຈະມີໃຫ້ບໍລິການແກ່ທ່ານ ແລະ ພວກເຮົາມີສິດຍົກເລີກຄຳສັ່ງຊື້ຂອງທ່ານໃນກໍລະນີທີ່ລາຄາປ່ຽນແປງກ່ອນຄຳສັ່ງຊື້ຂອງທ່ານຖືກປະຕິບັດ.

ວິທີການຊໍາລະເງິນຂອງຄອບຄົວ (Family Payment Method). ຖ້າທ່ານແມ່ນຜູ້ຈັດການຄອບຄົວຂອງກຸ່ມຄອບຄົວໃດໜຶ່ງໃນ Google Play, ທ່ານຈຳເປັນຕ້ອງຕັ້ງຄ່າວິທີການຊໍາລະເງິນຂອງຄອບຄົວໃຫ້ຖືກຕ້ອງເພື່ອໃຫ້ສະມາຊິກຄອບຄົວຂອງທ່ານໃຊ້ຊື້ເນື້ອໃນຕ່າງໆໃນ Google Play ແລະ ພາຍໃນແອັບ. ທ່ານຈະຕ້ອງຮັບຜິດຊອບການຊື້ເນື້ອໃນທັງໝົດຂອງສະມາຊິກຄອບຄົວຂອງທ່ານທຸກຄົນທີ່ໃຊ້ວິທີການຊໍາລະເງິນຂອງຄອບຄົວ. ຖ້າກຸ່ມຄອບຄົວຖືກລຶບ ຫຼື ສະມາຊິກຄອບຄົວອອກຈາກກຸ່ມຄອບຄົວ, ທ່ານອາດຈະຖືກຮຽກເກັບເງິນສຳລັບການຊື້ທີ່ຄ້າງຊຳລະທີ່ເກີດຂື້ນໂດຍສະມາຊິກຄອບຄົວໂດຍໃຊ້ວິທີການຊໍາລະເງິນຂອງຄອບຄົວ.

ການຊໍາລະເງີນຂອງ Google (Google Payments). ໃນການຊື້ເນື້ອໃນຜ່ານ Google Play, ທ່ານຕ້ອງມີບັນຊີ Google Payments ແລະ ຍອມຮັບເຫັນດີນຳ ຂໍ້ກຳນົດການບໍລິການ ຂອງ Google Payments. ແຈ້ງການຄວາມເປັນສ່ວນຕົວຂອງ Google Payments ມີຜົນບັງຄັບນຳໃຊ້ໃນທຸກຄັ້ງທີ່ທ່ານຊື້ເນື້ອໃນໂດຍໃຊ້ບັນຊີ Google Payments. ທ່ານຕ້ອງຮັບຜິດຊອບຈຳນວນເງີນທັງໝົດທີ່ຕ້ອງຊໍາລະທີ່ກ່ຽວຂ້ອງກັບການຊື້ທີ່ເຮັດຜ່ານ Google Play ໃນບັນຊີ Google Payments ຂອງທ່ານ.

ວິທີການດຳເນີນການຊໍາລະເງິນອື່ນ (Other Payment Processing Methods). Google ອາດຈະໃຫ້ບໍລິການວິທີການດຳເນີນການຊໍາລະເງິນຕ່າງໆແກ່ທ່ານ ນອກຈາກ Google Payments ເພື່ອອຳນວຍຄວາມສະດວກໃຫ້ແກ່ການຊື້ເນື້ອໃນຜ່ານ Google Play. ທ່ານຕ້ອງປະຕິບັດຕາມຂໍ້ກຳນົດ ແລະ ເງື່ອນໄຂທີ່ກ່ຽວຂ້ອງ ຫຼື ສັນຍາທາງກົດໝາຍອື່ນໆ ບໍ່ວ່າຈະກັບ Google ຫຼື ບຸກຄົນທີສາມ ທີ່ຄວບຄຸມການໃຊ້ວິທີດຳເນີນການຊໍາລະເງິນທີ່ໃຫ້ໄວ້. Google ອາດຈະເພີ່ມ ຫຼື ລຶບວິທີດຳເນີນການຊໍາລະເງິນອອກຕາມດຸນພິນິດຂອງຕົນພຽງຝ່າຍດຽວ. ທ່ານຮັບຜິດຊອບພຽງຝ່າຍດຽວສຳລັບຈຳນວນທັງໝົດທີ່ຕ້ອງຊໍາລະທີ່ກ່ຽວຂ້ອງກັບການຊື້ຕ່າງໆທີ່ທ່ານເຮັດຂື້ນໃນ Google Play.

ສິດໃນການຮຽກເກັບເງິນນຳຜູ້ໃຫ້ບໍລິການ. ເພື່ອກຳນົດສິດຂອງທ່ານໃນການການຊື້ເນື້ອໃນທີ່ທ່ານເຮັດຜ່ານອຸປະກອນເຊິ່ງຮຽກເກັບເງີນຈາກບັນຊີຂອງຜູ້ໃຫ້ບໍລິການເຄືອຂ່າຍ, ໃນເວລາທີ່ທ່ານສ້າງບັນຊີ Google Play ໃນອຸປະກອນ, ພວກເຮົາຈະສົ່ງຕົວລະບຸອຸປະກອນຂອງທ່ານ ເຊັ່ນວ່າ: ID ຜູ້ສະໝັກໃຊ້ ແລະ ໝາຍເລກລຳດັບແຜ່ນ SIM ຫາຜູ້ໃຫ້ບໍລິການເຄືອຂ່າຍຂອງທ່ານ. ເພື່ອອະນຸຍາດສິ່ງນີ້ ທ່ານຈຳເປັນຕ້ອງຍອມຮັບຂໍ້ກຳນົດການບໍລິການຂອງຜູ້ໃຫ້ບໍລິການເຄືອຂ່າຍ. ຜູ້ໃຫ້ບໍລິການເຄືອຂ່າຍອາດຈະສົ່ງຂໍ້ມູນທີ່ຢູ່ສຳລັບຮຽກເກັບເງິນຂອງທ່ານໃຫ້ພວກເຮົາ. ພວກເຮົາຈະຮັກສາໄວ້ ແລະ ໃຊ້ຂໍ້ມູນນີ້ອີງຕາມ ນະໂຍບາຍຄວາມເປັນສ່ວນຕົວ ຂອງ Google ແລະ ແຈ້ງການຄວາມເປັນສ່ວນຕົວ ຂອງ Google Payments.

ລາຄາ (Pricing). ລາຄາ ແລະ ຄວາມພ້ອມໃຊ້ງານຂອງເນື້ອໃນທັງໝົດທີ່ສະແດງຜ່ານ Google Play ອາດຈະປ່ຽນແປງໄດ້ທຸກເວລາກ່ອນການຊື້.

ອາກອນ (Taxes)."ອາກອນ" ໝາຍເຖິງຄ່າພາສີ, ຄ່າທຳນຽມພາສີຜ່ານແດນ, ການຮຽກເກັບພາສີ ຫຼື ອາກອນຕ່າງໆ (ນອກຈາກອາກອນລາຍໄດ້) ທີ່ກ່ຽວພັນກັບການຂາຍເນື້ອໃນ ລວມທັງຄ່າປັບໃໝ ຫຼື ດອກເບ້ຍທີ່ກ່ຽວຂ້ອງຕ່າງໆ. ທ່ານຕ້ອງຮັບຜິດຊອບຊໍາລະອາກອນ ແລະ ຕ້ອງຊໍາລະຄ່າເນື້ອໃນໂດຍບໍ່ມີການຫັກລົບຄ່າອາກອນໃດໆ. ຖ້າຜູ້ຂາຍເນື້ອໃນ ຫຼື Google ມີພັນທະເກັບເອົາ ຫຼື ຊໍາລະອາກອນ, ອາກອນຈະຖືກຮຽກເກັບນຳທ່ານ. ທ່ານຕ້ອງປະຕິບັດຕາມກົດໝາຍອາກອນທີ່ກ່ຽວຂ້ອງທັງໝົດ ລວມທັງການແຈ້ງລາຍງານ ແລະ ການຊໍາລະອາກອນທີ່ເກີດຂຶ້ນຈາກການໃຊ້ Google Play ຫຼື ການຊື້ເນື້ອໃນຢູ່ໃນ ຫຼື ຜ່ານ Google Play. ການແຈ້ງລາຍງານ ແລະ ການຊໍາລະອາກອນທີ່ກ່ຽວຂ້ອງດັ່ງກ່າວແມ່ນຄວາມຮັບຜິດຊອບຂອງທ່ານ.

ການຈົບການຂາຍທັງໝົດ (All Sales Final). ເບິ່ງ ນະໂຍບາຍການສົ່ງເງິນຄືນ ຂອງ Google Play ເພື່ອເປັນຂໍ້ມູນເພີ່ມເຕີມກ່ຽວກັບສິດທິຂອງທ່ານໃນການຖອນ, ຍົກເລີກ ຫຼື ສົ່ງຄືນສິ່ງທີ່ຊື້ເພື່ອຂໍຮັບເອົາເງິນຄືນ. ຍົກເວັ້ນຕາມທີ່ກຳນົດໄວ້ຢ່າງຈະແຈ້ງໃນຂໍ້ກຳນົດການບໍລິການຂອງ Google,ນະໂຍບາຍການສົ່ງເງິນຄືນ ຂອງ Google Play ຫຼື ນະໂຍບາຍການສົ່ງເງິນຄືນຂອງຜູ້ໃຫ້ບໍລິການ, ການຂາຍທັງໝົດແມ່ນຖືວ່າສິ້ນສຸດ ແລະ ບໍ່ອະນຸຍາດໃຫ້ສົ່ງຄືນ, ປ່ຽນໃໝ່ ຫຼື ສົ່ງເງິນຄືນໄດ້. ຖ້າມີການອະນຸຍາດໃຫ້ປ່ຽນໃໝ່, ສົ່ງຄືນ ຫຼື ສົ່ງເງິນຄືນສຳລັບທຸລະກຳຕ່າງໆໃດໜຶ່ງ, ທຸລະກຳດັ່ງກ່າວອາດຈະຖືກຍົກເລີກ ແລະ ທ່ານອາດຈະບໍ່ສາມາດເຂົ້າເຖິງເນື້ອໃນທີ່ທ່ານເຄີຍໄດ້ຮັບຜ່ານທຸລະກຳນັ້ນໄດ້ອີກຕໍ່ໄປ.

ການສະໝັກໃຊ້ເພື່ອຮັບຂໍ້ມູນ (Subscriptions). ການສະໝັກສະມາຊິກຈະຖືກ ແມ່ນຈະມີການຮຽກເກັບຄ່າການສະໝັກໃຊ້ໂດຍອັດຕະໂນມັດໃນແຕ່ລະໄລຍະຮຽກເກັບເງິນ (ບໍ່ວ່າຈະຢູ່ໃນຮູບແບບລາຍອາທິດ, ລາຍເດືອນ, ລາຍປີ ຫຼື ໄລຍະເວລາອື່ນ) ແລະ ທ່ານອາດຈະບໍ່ຖືກຮຽກເກັບເງິນກ່ອນ 24 ຊົ່ວໂມງກ່ອນເລີ່ມຕົ້ນແຕ່ລະໄລຍະຮຽກເກັບເງິນ.

(a) ໄລຍະທົດລອງໃຊ້ (Trials Periods). ໃນເວລາທີ່ທ່ານສະໝັກໃຊ້ເນື້ອໃນສຳລັບລາຄາໃດໜຶ່ງ, ທ່ານອາດຈະໄດ້ຮັບການເຂົ້າເຖິງຜົນປະໂຫຍດຂອງການສະໝັກໃຊ້ນັ້ນໂດຍບໍ່ເສຍຄ່າໃຊ້ຈ່າຍສຳລັບໄລຍະທົດລອງໃຊ້ທີ່ກຳນົດໄວ້ ຫຼັງຈາກນັ້ນທ່ານຈະຖືກຮຽກເກັບເງິນຈົນກວ່າທ່ານຈະຍົກເລີກການສະໝັກໃຊ້ຂອງທ່ານ. ເພື່ອຫຼີກເວັ້ນການຖືກຮຽກເກັບເງິນ, ທ່ານຕ້ອງຍົກເລີກກ່ອນສິ້ນສຸດໄລຍະທົດລອງໃຊ້. ເມື່ອທ່ານຍົກເລີກການທົດລອງໃຊ້ຂອງທ່ານແລ້ວ, ທ່ານຈະເສຍການເຂົ້າເຖິງເນື້ອໃນ ແລະ ສິດທິຕ່າງໆຂອງການສະໝັກໃຊ້ໃນທັນທີ ເວັ້ນເສຍແຕ່ວ່າມີການກຳນົດໄວ້ເປັນຢ່າງອື່ນ. ການເຂົ້າເຖິງໄລຍະທົດລອງໃຊ້ດັ່ງກ່າວອາດຈະຈຳກັດສະເພາະໃຫ້ແຕ່ການທົດລອງໃຊ້ສະເພາະຈຳນວນໜຶ່ງສຳລັບຜູ້ໃຊ້ແຕ່ລະຄົນໃນລະຫວ່າງໄລຍະເວລາທີ່ກຳນົດໄວ້ ຫຼື ການຈຳກັດອື່ນໆ.

(b) ການຍົກເລີກ (Cancellations). ທ່ານສາມາດຍົກເລີກການສະໝັກໃຊ້ໄດ້ທຸກເວລາກ່ອນສິ້ນສຸດໄລຍະຮຽກເກັບເງິນທີ່ນຳໃຊ້ຕາມທີ່ອະທິບາຍໄວ້ໃນ ສູນຊ່ວຍເຫຼືອ ແລະ ການຍົກເລີກຈະມີຜົນນຳໃຊ້ກັບໄລຍະຕໍ່ໄປ. ຕົວຢ່າງ: ຖ້າທ່ານຊື້ການສະໝັກໃຊ້ລາຍເດືອນ, ທ່ານສາມາດຍົກເລີກການສະໝັກໃຊ້ນັ້ນໄດ້ທຸກເວລາໃນລະຫວ່າງເດືອນໃດໆກໍໄດ້ຂອງການສະໝັກໃຊ້ ແລະ ການສະໝັກໃຊ້ນັ້ນຈະຖືກຍົກເລີກເມື່ອສິ້ນສຸດໄລຍະຮຽກເກັບເງິນປັດຈຸບັນຂອງທ່ານ. ທ່ານຈະບໍ່ໄດ້ຮັບການສົ່ງເງິນຄືນສຳລັບໄລຍະຮຽກເກັບເງິນປັດຈຸບັນ, ຍົກເວັ້ນມີການກຳນົດໄວ້ເປັນຢ່າງອື່ນໃນ ນະໂຍບາຍການສົ່ງເງິນຄືນຂອງ Google Play (ຕົວຢ່າງ ເມື່ອເນື້ອໃນມີຈຸດບົກຜ່ອງເສຍຫາຍ). (c) ສ່ວນຫຼຸດສຳລັບຜູ້ສະໝັກໃຊ້ສະບັບພິມ (Reductions for Print Subscribers). ຜູ້ໃຫ້ບໍລິການວາລະສານບາງທ່ານອາດຈະອະນຸຍາດໃຫ້ທ່ານຊື້ການສະໝັກໃຊ້ເນື້ອໃນວາລະສານທີ່ອອກເປັນຊ່ວງໄລຍະຢູ່ໃນ Google Play ໃນອັດຕາທີ່ຫຼຸດລົງ ຖ້າທ່ານແມ່ນຜູ້ສະໝັກໃຊ້ສະບັບພິມຢູ່ແລ້ວ. ຖ້າຫາກທ່ານຍົກເລີກການສະໝັກໃຊ້ສະບັບພິມຂອງວາລະສານທີ່ອອກເປັນຊ່ວງໄລຍະ ຫຼື ການສະໝັກໃຊ້ສະບັບພິມຂອງທ່ານໝົດອາຍຸ ແລະ ທ່ານບໍ່ໄດ້ຕໍ່ອາຍຸໃໝ່, ການສະໝັກໃຊ້ເນື້ອໃນນັ້ນໃນອັດຕາທີ່ຫຼຸດລົງຂອງທ່ານຢູ່ໃນ Google Play ຈະຖືກຍົກເລີກໂດຍອັດຕະໂນມັດ.

(d) ການຂື້ນລາຄາ (Price Increases). ເມື່ອທ່ານຊື້ການສະໝັກໃຊ້ໃດໜຶ່ງ, ທ່ານຈະຖືກຮຽກເກັບເງິນໃນເບື້ອງຕົ້ນໃນລາຄາທີ່ນຳໃຊ້ໃນເວລາທີ່ທ່ານຕົກລົງສະໝັກໃຊ້. ຖ້າລາຄາການສະໝັກໃຊ້ເພີ່ມຂຶ້ນໃນພາຍຫຼັງ, Google ຈະແຈ້ງບອກທ່ານ. ການຂຶ້ນລາຄາຈະມີຜົນນຳໃຊ້ກັບການຈ່າຍເງິນໃນຄັ້ງຕໍ່ໄປເມື່ອຮອດກຳນົດຊໍາລະຈາກທ່ານຫຼັງຈາກການແຈ້ງບອກນີ້, ໂດຍມີເງື່ອນໄຂວ່າທ່ານໄດ້ຮັບການແຈ້ງບອກລ່ວງໜ້າຢ່າງໜ້ອຍ 30 ມື້ກ່ອນເຮັດການປ່ຽນແປງ. ຖ້າທ່ານໄດ້ຮັບການແຈ້ງບອກລ່ວງໜ້າໜ້ອຍກວ່າ 30 ມື້, ການຂຶ້ນລາຄາຈະບໍ່ມີຜົນນຳໃຊ້ຈົນກວ່າຮອດການຊໍາລະເງິນຫຼັງຈາກຮອດກຳນົດຊໍາລະຄັ້ງຕໍ່ໄປ. ຖ້າທ່ານບໍ່ຕ້ອງການຊໍາລະລາຄາທີ່ເພີ່ມຂຶ້ນສຳລັບການສະໝັກໃຊ້ໃດໜຶ່ງ, ທ່ານສາມາດຍົກເລີກການສະໝັກໃຊ້ນັ້ນໄດ້ ຕາມທີ່ອະທິບາຍໄວ້ໃນຫົວຂໍ້ການຍົກເລີກຂອງຂໍ້ກຳນົດເຫຼົ່ານີ້ ແລະ ທ່ານຈະບໍ່ຖືກຮຽກເກັບເງິນເພີ່ມອີກສຳລັບການສະໝັກໃຊ້ນັ້ນ, ໂດຍບໍ່ມີເງື່ອນໄຂວ່າທ່ານໄດ້ແຈ້ງບອກພວກເຮົາກ່ອນສິ້ນສຸດໄລຍະຮຽກເກັບເງິນປັດຈຸບັນ. ໃນກໍລະນີທີ່ຜູ້ໃຫ້ບໍລິການຂຶ້ນລາຄາການສະໝັກໃຊ້ ແລະ ຈຳເປັນຕ້ອງມີການຍິນຍອມເຫັນດີ, Google ອາດຈະຍົກເລີກການສະໝັກໃຊ້ຂອງທ່ານ ເວັ້ນເສຍແຕ່ວ່າທ່ານເຫັນດີນຳລາຄາໃໝ່. ຖ້າການສະໝັກໃຊ້ຂອງທ່ານຖືກຍົກເລີກ ແລະ ໃນຕໍ່ມາທ່ານຕັດສິນໃຈສະໝັກໃຊ້ຄືນໃໝ່, ທ່ານຈະຖືກຮຽກເກັບເງິນຕາມອັດຕາລາຄາການສະໝັກໃຊ້ປັດຈຸບັນ.

4. ສິດທິ ແລະ ຂໍ້ຈຳກັດ (Rights and Restrictions)

ໃບອະນຸຍາດນຳໃຊ້ເນື້ອໃນ (License to Use Content). ຫຼັງຈາກເຮັດສຳເລັດທຸລະກຳ ຫຼື ຊໍາລະຄ່າທຳນຽມທີ່ກ່ຽວຂ້ອງສຳລັບເນື້ອໃນແລ້ວ, ທ່ານຈະມີສິດທິທີ່ບໍ່ຜູກຂາດ ພຽງຜູ້ດຽວຕາມທີ່ອະນຸຍາດໄວ້ຢ່າງຈະແຈ້ງໃນຂໍ້ກຳນົດເຫຼົ່ານີ້ ແລະ ນະໂຍບາຍທີ່ກ່ຽວຂ້ອງ ເພື່ອເກັບຮັກສາ, ເຂົ້າເຖິງ, ເບິ່ງ, ໃຊ້ ແລະ ສະແດງສຳເນົາຂອງເນື້ອໃນທີ່ກ່ຽວຂ້ອງໃນອຸປະກອນຂອງທ່ານ ຫຼື ຕາມການອະນຸຍາດສຳລັບການໃຊ້ສ່ວນຕົວທີ່ບໍ່ແມ່ນທາງການຄ້າ. ພວກເຮົາສະຫງວນສິດທິ, ກຳມະສິດ ແລະ ສິດຜົນປະໂຫຍດທັງໝົດໃນ Google Play ແລະ ເນື້ອໃນທີ່ບໍ່ໄດ້ອະນຸຍາດໃຫ້ຢ່າງຈະແຈ້ງແກ່ທ່ານໄວ້. ການໃຊ້ແອັບ ແລະ ເກມຂອງທ່ານອາດຢູ່ພາຍໃຕ້ຂໍ້ກຳນົດ ແລະ ເງື່ອນໄຂເພີ່ມເຕີມຂອງຂໍ້ຕົກລົງໃບອະນຸຍາດຜູ້ໃຊ້ປາຍທາງລະຫວ່າງທ່ານ ແລະ ຜູ້ໃຫ້ບໍລິການນັ້ນ.

ການລະເມີດຂໍ້ກຳນົດຂອງໃບອະນຸຍາດ (Violation of License Terms). ຖ້າທ່ານລະເມີດຂໍ້ກຳນົດໃດໜຶ່ງກໍຕາມ, ສິດທິຂອງທ່ານພາຍໃຕ້ໃບອະນຸຍາດນີ້ຈະສິ້ນສຸດລົງທັນທີ ແລະ Google ອາດຈະຍຸດຕິການເຂົ້າເຖິງ Google Play, ເນື້ອໃນ ຫຼື ບັນຊີ Google ຂອງທ່ານໂດຍບໍ່ມີການສົ່ງເງິນຄືນໃຫ້ແກ່ທ່ານ.

ຂໍ້ຈຳກັດ (Restrictions): ທ່ານບໍ່ສາມາດ:

ຂໍ້ບັນຍັດຂອງບຸກຄົນທີສາມ (Third-Party Provisions). ເຖິງແມ່ນຈະມີອັນໃດກໍຕາມທີ່ຂັດກັບຂໍ້ກຳນົດເຫຼົ່ານີ້, ບຸກຄົນທີສາມທີ່ອະນຸຍາດໃຫ້ໃຊ້ເນື້ອໃນຂອງຕົນແກ່ Google ແມ່ນຈະເປັນຜູ້ໄດ້ຮັບຜົນປະໂຫຍດທີ່ເປັນບຸກຄົນທີສາມທີ່ກຳນົດໄວ້ພາຍໃຕ້ຂໍ້ກຳນົດເຫຼົ່ານີ້ພຽງແຕ່ຜູ້ດຽວທີ່ກ່ຽວຂ້ອງກັບຂໍ້ບັນຍັດສະເພາະຂອງຂໍ້ກຳນົດເຫຼົ່ານີ້ທີ່ກ່ຽວພັນກັບເນື້ອໃນຂອງເຂົາເຈົ້າເທົ່ານັ້ນ ("ຂໍ້ບັນຍັດຂອງບຸກຄົນທີສາມ"), ແລະ ເພື່ອຈຸດປະສົງຂອງການເຮັດໃຫ້ບຸກຄົນທີສາມສາມາດບັງຄັບໃຊ້ສິດທິຂອງຕົນໃນເນື້ອໃນດັ່ງກ່າວເທົ່ານັ້ນ. ເພື່ອຫຼີກລ້ຽງຂໍ້ສົງໄສ, ບໍ່ມີຫຍັງໃນຂໍ້ກຳນົດເຫຼົ່ານີ້ທີ່ເປັນການໃຫ້ສິດຜູ້ໄດ້ຮັບຜົນປະໂຫຍດທີ່ເປັນບຸກຄົນທີສາມແກ່ຝ່າຍໃດໜຶ່ງ, ໃນສ່ວນທີ່ກ່ຽວກັບຂໍ້ບັນຍັດຕ່າງໆທີ່ຢູ່ນອກເໜືອຈາກຂໍ້ບັນຍັດຂອງບຸກຄົນທີສາມ ເຊິ່ງລວມມີ ແຕ່ບໍ່ຈຳກັດ ຂໍ້ບັນຍັດ ຫຼື ຂໍ້ຕົກລົງໃດໜຶ່ງທີ່ລວມເອົາໄວ້ຢູ່ໃນການອ້າງອີງ ຫຼື ທີ່ອາດຈະຖືກອ້າງອີງໄດ້ໂດຍບໍ່ໄດ້ລວມເອົາໄວ້ໃນຂໍ້ກຳນົດເຫຼົ່ານີ້.

ນະໂຍບາຍຂອງ Play (Play Policies). ການໂພສຄຳຕິຊົມໃນ Google Play ແມ່ນຂຶ້ນກັບ ນະໂຍບາຍ ຕໍ່ໄປນີ້. ຖ້າທ່ານຕ້ອງການແຈ້ງການລາຍງານທີ່ໃຊ້ໃນທາງທີ່ຜິດ ຫຼື ການລະເມີດເນື້ອໃນອື່ນໆ, ກະລຸນາຄລິກ ບ່ອນນີ້.

ເນື້ອໃນທີ່ຂໍ້ບົກຜ່ອງ (Defective Content). ເມື່ອເນື້ອໃນທີ່ພ້ອມມີໃຫ້ແກ່ທ່ານໃຊ້ຜ່ານບັນຊີຂອງທ່ານ, ທ່ານຄວນກວດເບິ່ງເນື້ອໃນໃນທັນທີເທົ່າທີ່ເຮັດໄດ້ຕາມຄວາມເໝາະສົມເພື່ອໃຫ້ແນ່ໃຈວ່າມັນໃຊ້ໄດ້ ແລະ ເປັນໄປຕາມທີ່ກຳນົດໄວ້ ແລະ ແຈ້ງບອກພວກເຮົາ ຫຼື ຜູ້ໃຫ້ບໍລິການໃນທັນທີທີ່ເຮັດໄດ້ຕາມຄວາມເໝາະສົມ ຖ້າທ່ານພົບເຫັນຂໍ້ຜິດພາດ ຫຼື ຈຸດບົກຜ່ອງ. ເບິ່ງ ນະໂຍບາຍການສົ່ງເງິນຄືນຂອງ Google Play ສຳລັບຂໍ້ມູນເພີ່ມເຕີມ.

ການລຶບອອກ ຫຼື ການບໍ່ມີເນື້ອໃນ (Removal or Unavailability of Content). ອີງຕາມຂໍ້ກຳນົດ, ເນື້ອໃນທີ່ທ່ານຊື້ ຫຼື ຕິດຕັ້ງຈະພ້ອມມີໃຫ້ແກ່ທ່ານຜ່ານ Google Play ຕາມໄລຍະເວລາທີ່ທ່ານເລືອກໄວ້, ໃນກໍລະນີການຊື້ ສຳລັບໄລຍະເວລາເຊົ່າ ແລະ ໃນກໍລະນີອື່ນໆ ດົນເທົ່າທີ່ Google ມີສິດທີ່ຈະເຮັດໃຫ້ເນື້ອໃນດັ່ງກ່າວມີພ້ອມໃຫ້ແກ່ທ່ານ. ໃນບາງກໍລະນີ (ຕົວຢ່າງ: ຖ້າ Google ສູນເສຍສິດທິທີ່ກ່ຽວຂ້ອງ, ມີການຢຸດເຊົາການບໍລິການ ຫຼື ເນື້ອໃນ, ມີບັນຫາດ້ານຄວາມປອດໄພຢ່າງຮ້າຍແຮງ ຫຼື ມີການລະເມີດຂໍ້ກຳນົດ ຫຼື ກົດໝາຍ), Google ອາດຈະລຶບເນື້ອໃນອອກຈາກອຸປະກອນຂອງທ່ານ ຫຼື ຢຸດເຊົາໃຫ້ທ່ານມີການເຂົ້າເຖິງບາງເນື້ອໃນສະເພາະທີ່ທ່ານຊື້ມາ. ສຳລັບເນື້ອໃນທີ່ຂາຍໂດຍ Google Digital Inc., ທ່ານອາດຈະໄດ້ຮັບການແຈ້ງບອກກ່ຽວກັບການລຶບອອກ ຫຼື ການຢຸດເຊົາດັ່ງກ່າວ, ໃນເວລາທີ່ເປັນໄປໄດ້. ຖ້າທ່ານບໍ່ສາມາດດາວໂຫຼດສຳເນົາຂອງເນື້ອໃນກ່ອນການລຶບອອກ ຫຼື ການຢຸດເຊົາດັ່ງກ່າວ, Google ອາດຈະສະເໜີໃຫ້ສິ່ງໃດໜຶ່ງຕໍ່ໄປນີ້ແກ່ທ່ານ (ກ) ການປ່ຽນເນື້ອໃນໃໝ່ຖ້າເປັນໄປໄດ້ ຫຼື (ຂ) ການຄືນເງິນເຕັມຈຳນວນ ຫຼື ບາງສ່ວນຂອງລາຄາເນື້ອໃນນັ້ນ. ຖ້າ Google ສົ່ງເງິນຄືນແກ່ທ່ານ, ການສົ່ງເງິນຄືນຈະແມ່ນການຊົດເຊີຍໃຫ້ແກ່ທ່ານພຽງຢ່າງດຽວ.

ຫຼາຍບັນຊີ (Multiple Accounts). ຖ້າທ່ານມີບັນຊີ Google ຫຼາຍບັນຊີທີ່ມີຊື່ຜູ້ໃຊ້ຕ່າງກັນ, ໃນບາງກໍລະນີທີ່ທ່ານສາມາດໂອນຍ້າຍເນື້ອໃນອອກຈາກບັນຊີໃດໜຶ່ງ ແລະ ໄປໃສ່ບັນຊີອື່ນໄດ້ ໂດຍມີເງື່ອນໄຂວ່າທ່ານແມ່ນເຈົ້າຂອງແຕ່ລະບັນຊີດັ່ງກ່າວ ແລະ ໂດຍມີເງື່ອນໄຂວ່າ Google ໄດ້ເປີດນຳໃຊ້ຄຸນສົມບັດຂອງການບໍລິການທີ່ກ່ຽວຂ້ອງທີ່ອະນຸຍາດໃຫ້ເຮັດການໂອນຍ້າຍດັ່ງກ່າວ.

ຂີດຈຳກັດໃນການເຂົ້າເຖິງໃນອຸປະກອນ (Limits on access on Devices). ໃນບາງຄັ້ງ Google ອາດຈະກຳນົດຂີດຈຳກັດຕໍ່ກັບຈຳນວນອຸປະກອນ ຫຼື ແອັບພລິເຄຊັນຊອບແວທີ່ທ່ານສາມາດໃຊ້ເພື່ອເຂົ້າເຖິງເນື້ອໃນ. ກະລຸນາເຂົ້າເບິ່ງ ກົດລະບຽບການໃຊ້ Google Play Movies & TV/Google TV ສຳລັບຂໍ້ມູນເພີ່ມເຕີມກ່ຽວກັບຂີດຈຳກັດເຫຼົ່ານີ້ສຳລັບ Google Play Movies & TV/Google TV.

ກິດຈະກຳທີ່ເປັນອັນຕະລາຍ (Dangerous Activities). ບໍ່ມີການບໍລິການ ຫຼື ເນື້ອໃນໃດໜຶ່ງທີ່ມີຈຸດປະສົງສຳລັບການໃຊ້ໃນການດຳເນີນສະຖານທີ່ນິວເຄຼຍ, ລະບົບຊ່ວຍຊີວິດ, ການສື່ສານແຈ້ງບອກເຫດສຸກເສີນ, ລະບົບການນຳທາງ ຫຼື ການສື່ສານຂອງເຮືອບິນ, ລະບົບຄວບຄຸມການຈະລາຈອນທາງອາກາດ ຫຼື ກິດຈະກຳອື່ນໆດັ່ງກ່າວ ເຊິ່ງໃນກໍລະນີເກີດມີການຂັດຂ້ອງຂອງການບໍລິການ ຫຼື ເນື້ອໃນດັ່ງກ່າວອາດນຳໄປສູ່ການເສຍຊີວິດ, ການບາດເຈັບຮ່າງກາຍ ຫຼື ຄວາມເສຍຫາຍທາງວັດຖຸ ຫຼື ສິ່ງແວດລ້ອມ.

Google Play Movies & TV/Google TV. ສຳລັບລາຍລະອຽດ ແລະ ຂໍ້ຈຳກັດເພີ່ມເຕີມກ່ຽວກັບການເຂົ້າເຖິງ ແລະ ການໃຊ້ Google Play Movies & TV/Google TV ຂອງທ່ານ, ກະລຸນາເບິ່ງ ກົດລະບຽບການໃຊ້ Google Play Movies & TV/Google TV.