माझ्या डोक्यात विचारचक्र चालू होते... माझ्या पेहरावाकडे माझे लक्ष गेले. काय त्या खलाशासारखा मी जीव द्यायला हवा आहे का? का त्या जुने कपडे विकणाऱ्या माणसासारखा बायकोचा खून करायला हवा होता? नाही. तसे मी काही केले नाही व करू शकलोही नाही. माझे रक्त उसळत असतानाही मी थंड डोक्याने पाहत बसलो. मी त्यांचा खून करायला हवा होता का? काय झाले असते त्याने? कौंट रोमानी एक खुनी ठरला असता अन् त्याचे काय? दोन मिनिटांत मृत्यू; बरे झाले. मी तसे काही केले नाही... मला त्या दोघांचा सूड घ्यायचा आहे. सूड घ्यायचा आहे... पण असा नाही... दोन मिनिटांत होत्याचे नव्हते... असे नाही... असा सूड की त्यांना जिवंत असताना असे वाटले पाहिजे, की त्यापेक्षा मृत्यू का येत नाही? असे हाल-हाल करून मारून मला त्यांचा सूड घ्यायचा आहे.