袁世凱死,中華民國進入軍閥時代,「軍閥」(warload)係貶義詞,表示衰到冇人有,表示擁有軍事實力嘅軍人或團體或政党,割地稱王,自成一國。當一個大一統政權倒臺嘅時候,就會進入軍閥割據時代,即內戰時代,原因好簡單,大佬死咗,啲細嘅就要爭上位,最後成為新坐館。響中國歷史上,每次大一統王朝結束,就會開始大分裂軍閥割據時代,最出名嘅有漢後三國時代、魏晉南北朝、唐滅後嘅五代十國、元朝滅後嘅中原大亂局,仲有我哋要講嘅中華民國軍閥時代。軍閥成為貶義詞,係因為佢哋最後冇成爲勝利者,事實上,蔣介石國民黨係軍閥系統,毛澤東共產黨亦都係軍閥系統,不過佢哋最後打贏咗仗,就成為正式嘅合法政權存在於歷史嘅論述中。歷史永遠由勝利者所執筆,所以一眾袁世凱死後執政嘅北洋軍閥,最後只能成為勝利政權嘅抹黑炮灰。
大軍閥嘅論述,由袁世凱死後接管一切軍政權勢嘅段祺瑞開始。